Një zjarr aksidental që nisi nga dera e pasme e një marketi vendosi në rrezik jetën e banorëve të një pallati dhe dogji 71 apartamente. Inxhinierët deklarojnë se shkak ishte fasada, pasi sipas rregullave teknike pallati nuk duhet të vishet me materiale të djegshme, por me materiale që i rezistojnë temperaturave të larta të flakëve. Edhe pse zjarri u shua, ndjenja e frikës vazhdon ndër banorët që përjetuan tmerrin.
Glenda Beqo, banore e pallatit, rrëfen se ishte në shtëpi me djalin e saj 3 vjeç e gjysmë, pa alarm e pa asnjë paralajmërim. “Isha në shtëpi me tim bir 3 vjeç e gjysmë, nuk kishte asnjë alarm dhe asnjë shenjë. Nuk qe panik, por mirë që dola zbathur me fëmijën në krah, kur zbrisnim shkallët binin copat nga lart. Siç ta thash ishte një tmerr”, thotë ajo. Ajo tregon se apartamenti që bleu në 2022 kushtoi 100 mijë euro, me çmim 900 euro për metër katror, dhe përbën “investimin e jetës” përveç kredisë që duhet ta shlyejë ende.
Pas zjarrit, për dy ditë është ndërprerë energjia elektrike dhe uji në kompleks. Banorët kërkojnë ndërhyrje urgjente nga OSHEE dhe UKT; një prej tyre, që thotë se ka blerë apartamentin para katër vitesh për 140 mijë euro dhe ka biznes në objekt, pret ardhjen e teknikëve të OSHEE dhe thekson se situata nuk duhet të zgjatet.
71 familjet e prekura presin zgjidhje për strehimin e tyre. Dera e të afërmve nuk mund të qëndrojë e hapur për shumë kohë, dhe banorët duan të dinë nëse do të marrin bonus qeraje ose ndonjë mbështetje tjetër, pasi nuk mund të jetojnë pafundësisht tek të afërmit. Ata shprehin shpresën që kompania Arlis të rindërtojë shtëpitë e tyre nga e para, këtë herë me një fasadë që të mbajë larg flakët e zjarrit.
