Qytetarët dhe zjarrfikësit e asfiksuar nga tymi pas një zjarri të fuqishëm pranë QSUT në Tiranë po lënë ambientet e spitalit, pasi janë në gjendje të mirë shëndetësore. Ngjarja ndodhi një ditë më parë, kur një pallat, pjesë e një kompleksi banimi, u përfshi nga flakët, duke shkaktuar dëme të mëdha materiale. Sipas raportimeve, 8 persona u asfiksuan nga tymi, përfshirë 6 zjarrfikës dhe 2 qytetarë, të cilët morën ndihmë mjekësore gjatë natës.
Pas shuarjes së flakëve, pamjet tregojnë se fasada e ndërtesës është djegur pothuajse tërësisht. Në operacionin për shuarjen e zjarrit u angazhuan edhe 2 helikopterë Cougar, ndërsa autoritetet vazhdojnë hetimet për të zbardhur shkaqet e ngjarjes. Dëmet materiale janë raportuar të jenë të konsiderueshme.
