Banorët e kompleksit “Arlis” në zonën e Farmacisë 10, të prekur nga zjarri, nënshkruan një peticion ku parashtrojnë kërkesa konkrete lidhur me dëmet, sigurinë dhe përgjegjësitë. Ata kërkojnë dëmshpërblim për qiranë deri në rindërtimin e apartamenteve dhe formalizimin e çdo detaji të këtij procesi, si dhe vëmendje të veçantë për certifikimin dhe kolaudimin e sistemeve të sigurisë elektrike dhe të mbrojtjes kundër zjarrit apo fatkeqësive të tjera natyrore.
Peticionin banorët e përmbledhin në pika: kërkojnë një ekspertizë të pavarur dhe të detajuar teknike për vlerësimin e sigurisë së materialeve termoizoluese në fasadë; zëvendësimin e menjëhershëm të materialeve të rrezikshme me materiale të certifikuara dhe rezistente ndaj zjarrit sipas standardeve evropiane; dhe një audit të plotë të sistemit të mbrojtjes kundër zjarrit, duke përfshirë sistemet e alarmit, pajisjet e fikjes së zjarrit dhe rrugët e evakuimit.
Banorët kërkojnë transparencë nga kompania ndërtuese mbi materialet e përdorura dhe kontrollet e cilësisë gjatë ndërtimit, si dhe përgjegjësi ligjore dhe administrative në rast se konstatohen neglizhencë ose shkelje të standardeve të sigurisë, përfshirë moscertifikimin e impianteve elektrike. Ata kërkojnë dëmshpërblim për të gjithë banorët dhe bizneset e dëmtuara, formalizimin e kontratave pranë noterit dhe rikthimin e apartamenteve në gjendjen e mëparshme sipas përmbajtjes së kontratës.
Mes kërkesave është sigurimi i strehimit dhe mbulimi i shpenzimeve të qirasë për banorët me apartamente të dëmtuara ose të djegura, si dhe pajisja e kompleksit me hidrantë dhe pajisje fikëse zjarri funksionale, që sipas tyre aktualisht kanë qenë jashtë funksionit.
Në vijim banorët kërkojnë përdorimin e Normave të Sigurisë Europiane EN dhe detyrimin e kontrollit të instalimeve (ujë, energji elektrike, gaz, ashensor). Shtrojnë kërkesa specifike: certifikatë sigurie dhe garanci për instalimet sipas standardeve evropiane; një projektligj për kontroll detyrues pas maksimumi 20 vjetësh; instalim i Salvavita për të gjitha instalimet elektrike qendrore dhe në çdo banesë; dhe matja e tokëzimit si pjesa më e rëndësishme e instalimeve elektrike. Dokumenti është nënshkruar nga banorët e pallatit “Arlis” (Tiranë, zona “Farmacia 10”).
