Pas më shumë se 30 minutash përpjekje, zjarrfikësit vunë nën kontroll zjarin që përfshiu zonën e Ujit të Ftohtë në Vlorë. Flakët u shfaqën në një nga zonat më të frekuentuara të qytetit gjatë sezonit turistik dhe rrezikuan disa bare, restorante dhe hotele, duke krijuar situatë alarmi për bizneset dhe vizitorët.
Për shkak të përhapjes së zjarrit dhe rrezikut të menjëhershëm, turistë dhe pushues u larguan përkohësisht nga lokalet për t’u shpëtuar rrezikut. Ndërhyrja e shpejtë e shërbimeve të zjarrfikëses bëri të mundur izolimin e flakëve dhe shmangien e përhapjes më të gjerë, ndërsa aktualisht situata është në proces normalizimi. Si rezultat i incidentit, disa biznese në zonë mbetën përkohësisht pa energji elektrike, gjendje që pati ndikim në funksionimin e tyre deri në rikthimin e shërbimit.
Ende nuk dihen shkaqet e rënies së zjarrit. Pritet që autoritetet të nisin verifikimet për të përcaktuar rrethanat e ngjarjes dhe origjinën e flakëve. Ndërhyrja e zjarrfikësve u fokusua në kufizimin dhe izolimin e zjarrit, duke lehtësuar kështu kthimin gradual të situatës në normalitet në zonën e prekur.
