Ministria e Mbrojtjes njofton se deri në orën 20:00 janë raportuar 24 vatra zjarri në rang vendi; 4 prej tyre mbeten aktive, ndërsa 5 vatra janë nën mbikëqyrje. Për mbështetje të operacioneve janë angazhuar 50 efektivë të Forcave të Armatosura dhe 1 helikopter.
Vatrat aktive janë të përqendruara në katër pika:
– Qafë e Helmës, Bulqizë: po punohet për shuarjen e zjarrit në një sipërfaqe me shkurre dhe pisha. Në terren janë angazhuar 23 forca operacionale nga MZSH Bulqizë dhe strukturat bashkiake. Sipas Ministrisë, nuk ka rrezik për zonat e banuara.
– Mali i Dardhës, Librazhd: zjarri vijon të djegë në brendësi, kryesisht në humus dhe trungje të dekompozuara; nuk rrezikohen banesat.
– Mali i Qukësit, Prrenjas: vijon puna për shuarjen e trungjeve të rrëzuara dhe bimësisë së ulët brenda vatrës; nuk ka rrezik për zonat e banuara.
– Drashovicë, Selenicë: po punohet për shuarjen e zjarrit në sipërfaqe pyjore me shkurre; në vend po operon 1 mjet zjarrfikës dhe 3 efektivë të MZSH Selenicë. Nuk ka rrezik për zonat e banuara.
Në vatrat e tjera situata paraqitet e përmirësuar. Në Malin e Dajtit, reshjet e shiut izoluan vatrat dhe zona do të mbahet nën mbikëqyrje; gjatë ditës u angazhuan 38 forca operacionale bashkiake dhe 50 efektivë të Forcave të Armatosura. Në Sarandë, zjarri në kurorën e qytetit është vënë nën kontroll pas angazhimit të MZSH-ve, Policisë, FNSH-së, forcave bashkiake dhe një helikopteri të FA-së; edhe kjo zonë do të mbahet nën mbikëqyrje.
Agjencia Kombëtare e Mbrojtjes Civile (AKMC) vijon ndjekjen e situatës në të gjithë territorin në koordinim me prefekturat, bashkitë dhe strukturat e sistemit të Mbrojtjes Civile. Kapacitetet operacionale mbeten të angazhuara në terren dhe në gatishmëri për ndërhyrje, me prioritet mbrojtjen e jetës, banesave dhe pasurisë së qytetarëve.
