Ministria e Mbrojtjes njofton se në territorin e vendit janë raportuar 17 vatra zjarri; prej tyre 4 mbeten aktive, 2 janë nën mbikëqyrje dhe 11 janë shuar. Në terren për përballimin e situatës janë angazhuar 164 forca operacionale dhe 13 automjete zjarrfikëse, ndërsa Forcat e Armatosura po japin mbështetje me 90 efektivë dhe 2 helikopterë.
Vatrat aktive identifikohen në Dajt, Vajkal të Bulqizës, Lundre të Matit dhe Therepel të Skraparit. Në Dajt vijon puna drejt Qafë-Priskës me 68 forca të angazhuara; Ministria raporton se aktualisht nuk ka rrezik për zonat e banuara dhe operacionet për izolimin dhe shuarjen e flakëve vazhdojnë në terren. Në Vajkal të Bulqizës zjarri po luftohet në terren shkëmbor, me mbi 13 hektar të përshkuara dhe 48 forca të angazhuara; sipas ministrisë nuk ka rrezik për banesat.
Në Lundre, bashkia Mat, situata sipas Ministrisë favorizohet nga era. Në këtë zonë janë angazhuar strukturat vendore, vullnetarë, 30 efektivë të Forcave të Armatosura dhe një helikopter. Në Therepel, Skrapar, në operacion marrin pjesë forca të MZSH nga Skrapari, Berati dhe Poliçani, vullnetarë, si dhe një helikopter i Forcave të Armatosura.
Vatrat në Qafën e Lugut–Vithkuq dhe malin e Qukësit–Prrenjas janë nën mbikëqyrje dhe nuk paraqesin rrezik për zonat e banuara, njofton ministria. Agjencia Kombëtare e Mbrojtjes Civile (AKMC) vijon ndjekjen e pandërprerë të situatës në të gjithë territorin e vendit, në koordinim me prefekturat, bashkitë dhe të gjitha strukturat e sistemit të Mbrojtjes Civile.
Kapacitetet operacionale mbeten të angazhuara në terren dhe të gatshme për ndërhyrje aty ku situata e kërkon, me prioritet mbrojtjen e jetës, banesave dhe pasurisë së qytetarëve, përfundon njoftimi i Ministrisë së Mbrojtjes.
