Evropa Jugore po përballet me një valë të re zjarresh shkatërruese, ndërsa temperaturat ekstreme përkeqësojnë situatën në Spanjë, Francë dhe vende të tjera të rajonit. Autoritetet kanë urdhëruar evakuimin e rreth 30 mijë personave, ndërsa mijëra zjarrfikës po luftojnë me flakët.
Qeveria spanjolle shpalli gjendje të jashtëzakonshme në rajonin e Madridit dhe provincën e Ávilës, pas zjarreve që dolën jashtë kontrollit gjatë valës së tretë të të nxehtit për këtë verë. Temperatura kanë arritur deri në 44.7°C dhe rreth 10 mijë banorë u evakuuan në zonat përreth Madridit. Për përballimin e situatës janë angazhuar edhe njësitë ushtarake të emergjencës. Kryeministri Pedro Sánchez deklaroi se qeveria ka mobilizuar të gjitha mjetet në dispozicion dhe bëri thirrje që qytetarët të respektojnë udhëzimet e autoriteteve. Sipas Sistemit Evropian të Informacionit për Zjarret në Pyje (EFFIS), mbi 1 milion hektarë janë djegur në Spanjë që nga fillimi i vitit.
Në Francën jugperëndimore një zjarr masiv pranë Bordosë ka djegur mbi 37 mijë hektarë pyje brenda pak më shumë se 24 orësh. Më shumë se 18 800 persona, përfshirë mijëra turistë, janë evakuuar nga kampingjet dhe shtëpitë e pushimit; disa banesa raportohet se janë shkatërruar. Rreth 800 zjarrfikës dhe katër avionë po punojnë për izolimin e flakëve. Flakët kanë përfshirë edhe zonën e Cap Ferret, duke detyruar mbylljen e rrugëve dhe evakuimin e mijëra banorëve.
Një valë e fortë e të nxehtit detar po prek rreth 80% të Mesdheut, me temperaturat e ujit deri në 5°C mbi mesataren klimatike për periudhën 1991–2020. EFFIS njofton se sipërfaqja e djegur në Bashkimin Evropian deri më 22 korrik është pothuajse dyfishuar krahasuar me mesataren e 20 viteve të fundit.
Shkencëtarët paralajmërojnë se ndryshimet klimatike dhe braktisja e tokave bujqësore po krijojnë kushte ideale për përhapjen e zjarreve me përmasa gjithnjë e më të mëdha. Profesori i inxhinierisë pyjore në Universitetin e Lleidës, Víctor Resco de Dios, tha se nuk mund të përjashtohen më skenarë ekstremë të ngjashëm me ata të Kalifornisë apo Australisë: “Së shpejti nuk do të mund të përjashtojmë skenarë si ‘Ferri i Dantes’, me zjarre që përfshijnë qindra mijëra apo edhe një milion hektarë.” Shkencëtarët theksojnë se ndryshimet klimatike kanë rritur ndjeshëm rrezikun e thatësirës në Evropë, duke sjellë pasoja të rënda për njerëzit, bujqësinë dhe ekosistemet.
