Lisbona u trondit nga një aksident tragjik mbrëmjen e djeshme, kur një tramvaj doli nga shinat dhe u përplas me ndërtesat përgjatë një rruge të pjerrët, duke shkaktuar 17 viktima dhe mbi 20 të plagosur. Ngjarja ndodhi rreth orës 18:00 me orën lokale në linjën e njohur “Glória”, e cila përshkruan një udhëtim prej 744 metrash. Karroca, e cila kishte rreth 38 udhëtarë, mes tyre vendas dhe turistë, humbi kontrollin pasi një kabllo e rëndësishme u këput, transformuar tramvajin në një “makinë pa frena”.
Dëshmitarët e ngjarjes raportuan një “zë metalik të fortë” para se tramvaji të dilte nga shinat dhe të rrëzohej mbi trotuar. Pas kësaj, ai u përplas me një kthesë të ngushtë dhe u shkatërrua përballë një hoteli. Në mesin e viktimave është identifikuar edhe frenuesi i tramvajit, André Marques, si dhe një turist gjerman. Viktimat përfshijnë shtetas nga disa vende, përfshirë Portugali, Gjermani, Spanjë, Kore të Jugut, Kanada, Itali, Francë, Zvicër, Marok dhe Kepi i Gjelbër.
Autoritetet portugeze shpallën tri ditë zie kombëtare për këtë tragjedinë. Ekspertët ndërkombëtarë ngritën shqetësime se sistemi duhet të kishte pasur frena emergjente që nuk kishin funksionuar siç duhej. Raportet lokale sugjerojnë gjithashtu se kabllot e nevojshme për funksionimin e tramvajit nuk ishin nënshtruar kontrolleve të rregullta prej ditësh, ndonëse këto verifikime janë të detyrueshme.
Fabiana Pavel, kryetare e Shoqatës së Banorëve të Bairro Alto, kritikoi përdorimin e tepërt turistik të linjës “Glória”, duke thënë se ajo është mbingarkuar dhe përdoret përtej funksionit të saj si transport publik. Hetimet për shkaqet e aksidentit vazhdojnë, ndërsa ekipi teknik është ende në vendngjarje për të analizuar dëmet dhe për të dokumentuar provat. Ky aksident ka nxjerrë në pah nevojën urgjente për rregullore më strikte dhe kontroll më të rreptë të transportit publik në qytet.
