Më 1 tetor, Policia Katalanase (Mossos d’Esquadra) arrestoi një grup kriminal që prej vitesh kishte grabitur rezidencat e futbollistëve të FC Barcelonës dhe disa shtëpi të tjera luksoze në rajonet Maresme, Baix Llobregat dhe Garraf. Midis të arrestuarve është edhe një 58-vjeçar shqiptar nga Kosova, i identifikuar si Arsim Blaku. Ai njihet si personi përgjegjës për operacionin e dështuar të hyrjes në shtëpinë e familjes Tous në vitin 2006, ku një nga bashkëpunëtorët e tij u vra nga dhëndri i familjes. Ngjarja nuk e pengoi Blakun të vazhdonte aktivitetin kriminal në vitet në vijim.
Sipas raportimeve, Blaku u largua nga Spanja në 2022 dhe u rikthye në nëntor të 2025. Një muaj më vonë, në dhjetor, ai hyri me forcë në banesën e mbrojtësit Pau Cubarsí, ndërsa në janar kreu të njëjtën vepër në shtëpinë e portierit Joan García. Në muajt pasues, Blaku kryeu edhe grabitje të tjera dhe u pa duke vëzhguar pranë rezidencës së mbrojtësit Jules Koundé.
Policia arriti t’i vinte gjurmët Blakut dhe bashkëpunëtorëve falë një informacioni konfidencial. Burimi paralajmëronte se një person po mburrej se u kishte vjedhur orët luksoze lojtarëve si Cubarsí e Joan García dhe po përpiqej t’i shiste në tregun e zi. Ky informacion çoi në operacionin që rezultoi në arrestime.
Përveç Blakut, në kuadër të hetimit u ndaluan edhe persona të tjerë. David B. V., i njohur me pseudonimin Chucho, u mor nën hetim por më vonë u lirua; policia thotë se ai kishte rolin e vëzhgimit dhe të drejtimit të automjetit gjatë kryerjes së grabitjeve. Një tjetër e arrestuar është Rosa G., 40 vjeçe, me 18 dënime të mëparshme, e cila merrej me logjistikën dhe me marrjen me qira të automjeteve të përdorura për vëzhgim. Lajmi është raportuar nga La Vanguardia dhe u transmetua nga Top Channel.
