Një atentat me armë zjarri raportohet të ketë ndodhur mbrëmjen e sotme në fshatin Gjashtë, në dalje të Sarandës, në rrugën kryesore Sarandë–Delvinë. Sipas informacioneve paraprake, viktimë ka mbetur pronari i një karburanti, i identifikuar si Rexhep Ismaili, 66 vjeç, i cili ka marrë një plumb në kokë.
Ngjarja ka ndodhur brenda lokalit të karburantit në pronësi të 66-vjeçarit. Burimet bëjnë me dije se pas një konflikti të ndodhur disa ditë më parë, autori dyshohet se ka shkuar i armatosur në ambientet e karburantit dhe ka qëlluar me pistoletë ndaj viktimës, e cila ndodhej në lokalin e biznesit të tij, në tavolinë me persona të tjerë. Pas të shtënave, persona që ndodheshin prapa banakut kanë nxjerrë një armë automatike dhe kanë qëlluar në drejtim të autorit, por ky i fundit ka arritur të largohet nga vendngjarja.
Rezulton se Rexhep Ismaili është kryetar i Shoqatës Çamëria, dega Sarandë. Burime për gazetaren e Top Channel, Entjola Budo, bëjnë me dije se viktima ishte njeri korrekt dhe pa ndonjë konflikt të mëparshëm. Në vendin e ngjarjes kanë mbërritur forca të shumta policie.
Rrethanat e krimit vijojnë të jenë të paqarta; autorët janë larguar pa lënë gjurmë dhe po punohet për identifikimin e tyre. Policia dhe forcat e tjera të rendit ndodhen në vendin e ngjarjes dhe po kryejnë veprimet e para hetimore dhe sigurimin e ambientit. Informacionet e mëtejshme rreth shkaqeve, numrit të të përfshirëve dhe gjendjes së personave të tjerë që ndodheshin në lokal nuk janë bërë publike deri më tani. Më shumë të dhëna priten pas përfundimit të veprimeve hetimore dhe identifikimit të autorëve.
