Qeveria miratoi sot vendime që përfshijnë ndihma për familjet e policëve të rënë në krye të detyrës dhe dërgimin e forcave ushtarake në Gaza. Ministri i Punëve të Brendshme, Besfort Lamallari, njoftoi se familjet e policëve që kanë humbur jetën gjatë detyrës do të përfitojnë paga dhe pension familjar, si dhe masë të tjera mbështetëse.
U miratuan dy vendime që përcaktojnë masat dhe procedurat për punonjësit e policisë, përfshirë shpërblimin dhe mbështetjen për ata që janë plagosur gjatë ushtrimit të detyrës. Si ndihmë e menjëhershme për familjarët e policëve të rënë, parashikohet një pagesë që mund të shkojë deri në 10 paga mujore bruto të punonjësit të ndjerë. Përveç kësaj, vendimet parashikojnë pension familjar dhe bursa të plota për fëmijët e tyre.
Gjithashtu parashikohet punësimi me prioritet i familjarëve të punonjësve të policisë që kanë rënë në detyrë. Për përballimin e strehimit të familjeve të prekura, u njoftua se do të shpërndahen banesa falas për bashkëshortet dhe fëmijët e mitur, të siguruara nga Enti Kombëtar ose nga projekte të tjera, përfshirë dhe banesa që vijnë nga konfiskimet e bëra ndaj krimit të organizuar.
Përsa i përket angazhimeve ndërkombëtare, u njoftua gjithashtu se do të dërgohen oficerë të shtabit në Gaza. Shqipëria ka marrë një angazhim në këtë drejtim dhe ka kryer shqyrtimin e rrethanave në Gaza, ndërsa vendimi për dërgimin e oficerëve të shtabit do të merret javën në vijim.
Në lidhje me samitet e NATO-s, u tha se Samiti i NATO-s është vendosur që të zhvillohet në Shqipëri, por zhvillimin përfundimtar dhe datën e organizimit e vendosin krerët e shteteve anëtare. U përmend se mbajtja e samitit në 2027 ose në një vit tjetër do të përcaktohet nga vendimet e krerëve të vendeve anëtare.
