Pas nokautit në raundin e dytë ndaj norvegjezit Thomas Narmo në “O2 Arena”, boksieri shqiptar Nelson Hysa iu drejtua zonës VIP dhe nisi një përplasje të ashpër “fytyrë më fytyrë” me kampionin e botës Agit Kabayel. Hysa, i papërmbajtur pas fitores dhe me bilanc të paprekur 25-0, i kërkoi llogari Kabayelit për shmangien dhe nxiti tensionin në vendngjarje, deri në momentin kur u desh ndërhyrja e sigurisë për të parandaluar një përleshje fizike.
Transkripti i shkurtër i dialogut përballë ringut tregon shkëmbimin provokues midis të dyve: Hysa filloi me pyetjen “Ke frikë nga unë?”, ndërsa Kabayel u përgjigj “Jo, unë mund të ndeshem me këdo.” Hysa e sfidoi përsëri duke kërkuar pse Kabayel nuk pranon duel me të, dhe deklaroi se është i gatshëm të shkojë në Gjermani për ta ndeshur: “Unë po vij në Gjermani, në shtëpinë tënde, për t’u ndeshur me ty.” Kabayel u përgjigj shkurt “S’ka problem,” por paralajmëroi Hysën “Mos trego mungesë respekti, se do të përfundojë keq për ty.” Hysa gjithashtu u shpreh me ton kërcënues: “Mos ki frikë, do të të bëj nokaut!”
Pas incidentit në VIP, debate dhe deklarata të forta vazhduan edhe para kamerave. Përpara mikrofonave të “DAZN”, Hysa tha se shkoi te Kabayel sepse ky i fundit “vazhdon të më fshihet dhe të vrapojë larg meje,” duke theksuar se është 25-0 dhe kërkon të ndeshet për titull: “Dua Agit Kabayel dhe të gjithë kampionët!” Kabayel, duke u përpjekur të minimizojë presionin publik, pranoi mundësinë e një përballjeje, por e paraqiti si një ndeshje të lehtë dhe me interes financiar: “Epo hajde në Gjermani atëherë, jam gati. Janë para të lehta dhe një ndeshje e lehtë. Nëse nuk ka njeri rrotull, ndoshta mund të ndeshem me të këtë vit.”
Lidhur me këtë shkëmbim, media boksit po monitoron zhvillimet për të parë nëse Kabayel do të mbajë fjalën dhe do të pranojë të përballet me Hysën.
