Marcos Llorente ka njoftuar përmes rrjeteve sociale tërheqjen e tij nga Kombëtarja e Spanjës. Mesfushori i Atlético Madrid bëri të ditur se këtë vendim e kishte marrë përpara zhvillimit të Botërorit të fundit, pavarësisht nëse do të grumbullohej apo jo dhe pavarësisht rezultatit të turneut. Ai theksoi se bëhet fjalë për një zgjedhje personale dhe të menduar gjatë, duke pranuar se vendimi mund të mos kuptohet lehtë nga të gjithë.
Llorente, 31 vjeç, debutoi me fanellën e Spanjës më 11 nëntor 2020 në një ndeshje miqësore ndaj Holandës. Gjatë karrierës së tij me “La Roja” ka zhvilluar 27 ndeshje, ku ka regjistruar katër asistime, por nuk ka shënuar asnjë gol. Në mesazhin e publikuar, ai shprehu ndër të tjera: “Pas shumë kohësh duke e menduar, kam vendosur ta mbyll kapitullin tim me Kombëtaren. Jam i vetëdijshëm se jam ende i ri dhe se, ndoshta, nëse do të vazhdoja t’i bëja gjërat mirë, do të kisha ende vite për të luajtur me këtë fanellë.”
Llorente pranoi se e kupton që shumë nga tifozët dhe ndjekësit mund të mos pajtohen me vendimin: “E di që shumë prej jush nuk do ta kuptoni dhe, me siguri, as unë nuk do ta kisha kuptuar po të isha në vendin tuaj. Por është një vendim personal, shumë i menduar dhe, mbi të gjitha, i ndjerë.” Ai përsëriti se tërheqja nuk lidhej me pjesëmarrjen në Botëror apo me një eventual triumf, duke shtuar: “Pavarësisht nëse do të shkoja në Botëror apo jo, apo nëse do të fitonim apo jo, këtë vendim e kisha marrë tashmë.”
Në përfundim të mesazhit, Llorente falënderoi të gjithë ata që kanë qenë pjesë e rrugëtimit të tij me Kombëtaren, veçanërisht shokët e skuadrës me të cilët përjetoi ditët e fundit. Ai përmendi se ishte krenari ta përfaqësonte vendin e tij dhe përfundoi me një falënderim: “Ka qenë një krenari të përfaqësoja vendin tim dhe të isha pjesë e kësaj historie. Faleminderit për gjithçka.”
