Presidenti serb Aleksandër Vuçiç përsëriti retorikën nacionaliste duke theksuar se Kosova është pjesë e Serbisë, gjatë fjalimit të tij drejtuar kadetëve të rinj të Forcave të Armatosura serbe në ceremoninë e diplomimit në Banjicë. Ai deklaroi se “Kosova është pjesë e atdheut tonë, pjesë e Serbisë sonë, si sipas Kushtetutës ashtu edhe sipas drejtësisë së Zotit”, duke kërkuar që kjo të mbahet mend dhe të mbrohet si një shenjtëri, por “pa prekur askënd, pa sulmuar askënd dhe pa kërcënuar askënd”.
Në fjalimin e tij Vuçiç sulmoi hapur marrëveshjen e bashkëpunimit ushtarak mes Shqipërisë, Kosovës dhe Kroacisë, duke e cilësuar këtë pakt si një akt kundër Serbisë. Ai tha se në rajon po formohen aleanca kundër Serbisë dhe se Qeveria kishte kuptuar këto lëvizje, duke nisur të ndërmarrë veprimet që i konsideron të nevojshme. Vuçiç theksoi shqetësimin e tij për mosrespektimin e së drejtës ndërkombëtare dhe të Kartës së Kombeve të Bashkuara, duke e paraqitur atë si një rrethanë ku roli i forcave të armatosura bëhet esencial.
Duke folur para kadetëve, ai i quajti ata “garantuesit e sigurisë dhe mbrojtjes së qytetarëve të Serbisë” në një kohë kur, sipas tij, rendi ndërkombëtar nuk po respektohet. Ndërkohë në kuadër të ceremonisë, Vuçiç nderoi kadetët më të dalluar të Akademisë Ushtarake dhe u dorëzoi shpatat e oficerëve me dedikim, duke përmbyllur pjesën e nderimeve dhe ceremonisë zyrtare.
Fjalimi i tij u përcoll si një kombinim i theksimit të pretendimeve kushtetuese dhe fetare mbi Kosovën, kritikes ndaj bashkëpunimeve ushtarake të shteteve të tjera të rajonit dhe theksimit të rëndësisë së forcave të armatosura si mbrojtëse të sigurisë kombëtare.
