Marrin fund ditët e burgut. Sot Prokuroria kërkoi hetimin në gjendje të lirë të dy vëllezërve të dyshuar për vrasjen e fqinjit të tyre Indrit Ndoj në Fushë-Krujë, ngjarje e ndodhur më 21 tetor 2022. Kërkesa e akuzës u mbështet nga gjyqtarja e Krujës Konstandina Kuro e cila vendosi që Sajmir dhe Landi Miri të mos hetohen më në masë arresti me burg por të jenë të lirë me detyrimin për t’u paraqitur në gjykatë.
Vendimtare ishte dalja e analizave të ADN-së, që ka sjellë përjashtimin nga autorësia e krimit të dy vëllezërve Landi dhe Sajmir Miri. Prokuroria e Krujës është njohur me ekspertizën e ADN-së, ekspertizë e cila ishte kërkuar me qëllim krahasimin e përputhshmërisë së njollës së gjakut të gjendur në një çorape dhe palë tuta, të cilat u sekuestruan në banesën e dy vëllezërve Landi dhe Saimir Miri.
Për shkak se gjaku nuk lidhej me atë të viktimës, Indrit Ndoj, prokuroria e Krujës mesditën e sotme kërkoi caktimin e masës detyrim paraqitje për dy vëllezërit Landi dhe Saimir Miri. Kërkesa e prokurorisë është pranuar dhe nga gjykata, duke sjellë lirimin e menjëhershëm të dy vëllezërve, që në muajin nëntor 2022 u arrestuan si persona të dyshuar për ekzekutimin e Indrit Ndoj.
Trupi i të riut u gjet i pajetë mëngjesin e 21 Tetorit nga familjarët, në një kanal. Pas këqyrjes u konstatua fakti se plagët ishin shkaktuar nga goditje me kaçavidë. Viktima Indrit Ndoj, rezultonte i arrestuar në shtator të 2021-it, për trafik të emigrantëve të paligjshëm.
