Detaje të reja kanë dalë në lidhje me vrasjen e Artur Tushit, një 44-vjeçar shqiptar, i cili u qëllua 11 herë jashtë qendrës tregtare Santafé në Medellín, Kolumbi, në tetor të vitit të kaluar. Hetuesit kanë identifikuar autorët e krimit, të cilët dyshohet se janë pjesë e grupit kriminal “La Oficina Premium”. Ky grup është i njohur për vrasjet me pagesë të individëve të huaj me profil të lartë në Kolumbi dhe vende të tjera.
Vrasja e Tushit dyshohet se është e lidhur me trafikimin e qenieve njerëzore dhe narcotikëve, përfshirë bandat kriminale shqiptare, ekuadoriane dhe kolumbiane. Tushi u qëllua ndërsa po kthehej në shtëpi, në një atentat që duket se kishte për objektiv eleminimin e aktivitetit të tij kriminal. Rasti i tij përfshihet në një seri katër vrasjesh të huajve në Medellín gjatë viteve të fundit dhe përfshin viktima nga Meksika, SHBA dhe Kanada.
Një nga viktimat tjetër, Horacio Pérez Ledezma, 54 vjeç, humbi jetën në një restorant në El Poblado, ndërsa kanadezët, Jonathan Acevedo García dhe Jesse Arrigo, u qëlluan për vdekje në dy lokacione të ndryshme të qytetit. Emrat e viktimave me shtetësi amerikane nuk janë bërë të ditur nga autoritetet.
Kryetari i bashkisë, Federico Gutiérrez, ka theksuar se organizata kriminale operon nën një rrjet ndërkombëtar dhe ka lidhje me vrasjet në Meksikë, Republikën Dominikane dhe Kili. Hetimet kanë zbuluar përdorimin e komunikimeve ndërkombëtare dhe rrjeteve financiare për të fshehur aktivitetet e tyre, duke përfshirë pagesat për ekzekutimet, të cilat variojnë nga 400,000 deri në 500,000 dollarë, në varësi të profilit të viktimës.
Gjashtëmbëdhjetë persona janë nën hetim për vrasje, trafik armësh dhe aktivitete të tjera kriminale. Autoritetet vazhdojnë të hetojnë lidhjet ndërkombëtare dhe implikimet penale të grupit “La Oficina Premium”, në përpjekje për të zbardhur këtë rrjet të ndërlikuar kriminal.
