Janë zhvilluar mesditën e sotme, njëra pas tjetrës, seancat për caktimin e masës së sigurimit ndaj 31-vjeçarit Kostandin Vogli dhe 50-vjeçarit Tori Ruci alias Viktor Ruci. Konflikti i pronësisë mbi një Beach-Bar në bregdetin e Bashkisë Himarë degjeneroi në sherr me sende të forta dhe më pas në vrasjen e 66-vjeçarit Rexhep Ismaili, mbrëmjen e 7 majit në Gjashtë të Sarandës, sipas raportimit të korrespondentes së Top Channel Entjola Budo.
I pari para gjykatës doli 50-vjeçari Tori Ruci. Ai ishte ndaluar nga policia ditën e shtunë, pasi ndaj tij ishte caktuar masa e sigurimit “Arrest në shtëpi” për veprën penale “Moskallzim i krimit”. Gjatë seancës për verifikimin e kushteve e kritereve të zbatimit të masës, gjyqtari Mikel Hysometaj vendosi vazhdimin e zbatimit të masës “Arrest në shtëpi”, duke detyruar të dyshuarin të mos largohet nga banesa e tij në fshatin Gjashtë të Sarandës. Në aktet e para rezulton se Ruci është i dënuar më parë për “prodhim dhe shitje të lëndëve narkotike”.
Më pas prokurorja e çështjes, Armida Kaçi, dhe gjyqtari Mikel Hysometaj u zhvendosën në spitalin “Petro Nako” të Sarandës, ku mbahet i shtruar nën masa sigurie 31-vjeçari Kostandin Vogli, i plagosur me armë zjarri në këmbë. Prokurorja ka ngritur ndaj tij tre akuza: “Moskallzim i krimit”, “Shkatërrim i pronës” kryer në bashkëpunim dhe “Kanosja” e kryer në bashkëpunim. Gjyqtari pranoi kërkesën e prokurores për caktimin e masës së sigurimit “Arrest në burg” ndaj Voglinit.
Megjithatë, Gjykata shprehu qëndrim të ndryshëm nga Prokuroria për çështjen e veshjes së faktit juridik. Sipas Gjykatës, cilësimi i duhur ligjor, deri në këto momente dhe mbi bazën e akteve të paraqitura, duhet të jetë “Vrasja me dashje” kryer në bashkëpunim, mbetur në tentativë, si dhe “Moskallëzim i krimit” dhe “Shkatërrimi i pronës” kryer në bashkëpunim.
