Njëmbëdhjetë persona u paraqitën këtë të hënë para prokurorit të Shkallës së Parë në Serres, përfshirë një shqiptar dhe një gjeorgjian, që dyshohen si autorët kryesorë të vrasjes së dyfishtë brenda burgut të Nigritës. Ngjarja ndodhi pasditen e së dielës rreth orës 16:00 në sektorin e qelive disiplinore gjatë kohës së ajrimit të të burgosurve.
Sipas të dhënave paraprake, disa të burgosur dolën nga qelitë e tyre, thyen drynat e qelizave të tjera dhe më pas, në mënyrë të organizuar, sulmuan me mjete të mprehta — kryesisht thika të improvizuara — të burgosur të tjerë. Nga sulmi mbetën të vdekur një 46-vjeçar algjerian me shtetësi palestineze dhe një 43-vjeçar irakian. Përplasja dyshohet të ketë lidhje me larje hesapesh mes grupeve brenda burgut, ndërsa dëshmitë tregojnë se sulmi ishte i shpejtë dhe i dhunshëm, duke shkaktuar panik në ambientet e burgut.
Punonjësit e burgut ndërhynë menjëherë për të ndarë të përfshirët dhe për të dhënë ndihmën e parë, ndërsa në vendngjarje mbërriti edhe ambulanca e urgjencës. Gjatë kontrollit në ambientet e burgut, autoritetet sekuestruan dy thika të improvizuara dhe objekte të tjera metalike që dyshohen se janë përdorur në sulm.
Policia arrestoi gjithsej 11 persona, përkatësisht tetë shtetas grekë dhe tre të huaj. Sipas informacionit të dhënë, shqiptari dhe gjeorgjiani konsiderohen autorët e drejtpërdrejtë të vrasjeve, ndërsa nëntë të tjerët akuzohen për pjesëmarrje në përleshjen e përgjakshme.
Hetimet për ngjarjen po vijojnë nga Drejtoria e Hetimit të Krimeve në Serres. Gjithashtu është urdhëruar një hetim disiplinor për të sqaruar plotësisht rrethanat e incidentit dhe mënyrën se si ndodhi përplasja brenda një zone të kontrolluar si burgu.
