Lidhja Demokratike e Kosovës (LDK) mban sot Kuvendin e Jashtëzakonshëm, ku 355 delegatë do të votojnë për të vendosur nëse Lumir Abdixhiku do të vazhdojë të drejtojë partinë apo do të shkarkohet nga posti i kryetarit. Kuvendi u thirr pasi u përmbushën procedurat statutare dhe kërkesa për mbledhje u mbështet nga të paktën një e treta e delegatëve, kriter i nevojshëm për organizimin e një Kuvendi të jashtëzakonshëm.
Sipas njoftimit të partisë, Sekretariati i Përgjithshëm verifikoi se ishin plotësuar të gjitha kushtet statutare për zhvillimin e procesit. Kryetari i LDK-së, Lumir Abdixhiku, caktoi mbajtjen e Kuvendit për datën 30 korrik, me fillim në orën 18:00, në përputhje me kompetencat e parashikuara në Statutin e partisë. Nënshkrimet për thirrjen e Kuvendit u dorëzuan në mesin e muajit korrik.
Pas nisjes së procesit, Abdixhiku pezulloi negociatat për formimin e institucioneve të reja të Kosovës deri sa të përfundojë votëbesimi ndaj tij. Në rast se ai merr mbështetjen e delegatëve dhe konfirmohet në krye të LDK-së, pritet t’u rikthehet bisedimeve për formimin e institucioneve. Ndërkaq, seanca konstituive e Kuvendit të Kosovës është caktuar të mbahet më 6 gusht.
LDK ka bërë të ditur se i gjithë procesi do të zhvillohet në përputhje me Statutin e partisë, parimet demokratike, transparencën institucionale dhe respektimin e vullnetit të delegatëve. Për mbajtjen e Kuvendit u ndiqën hapat e kërkuar statutarisht, duke përfshirë verifikimin e nënshkrimeve dhe konstatimin e plotësimit të kushteve për të thirrur një seancë të jashtëzakonshme. Procesi vendos për të ardhmen e drejtimit të partisë dhe, sipas njoftimeve zyrtare, do të realizohet brenda kornizave që përcakton statuti dhe rregullat e brendshme të LDK-së.
