Dusan Vlahovic është zyrtarisht futbollist i Besiktasit. Sulmuesi serb ka firmosur një kontratë trevjeçare me klubin turk, me një pagë prej 7.5 milionë euro në sezon, dhe sipas raportimeve ka marrë rreth 10 milionë euro bonus në momentin e firmës. 26-vjeçari, që priste ofertën e një klubi të madh europian, në fund zgjodhi Turqinë; një rol të rëndësishëm në vendimin e tij luajti trajneri Vincenzo Italiano, i cili e kërkoi me insistim.
Vlahovic mbërriti në Stamboll nën entuziazmin e tifozëve të Besiktasit dhe, pasi kaloi testet mjekësore me sukses, transferimi u bë zyrtar. Lajmi vjen pas përfundimit të aventurës së tij me Juventusin dhe largimit nga Torino.
Sulmuesi i dha lamtumirën Juventusit përmes një mesazhi emocional në rrjetet sociale. Në atë mesazh ai shprehu vështirësinë për të gjetur fjalët e duhura dhe rikujtoi ëndrrën që kishte kur mbërriti në Torino, si dhe krenarinë për të mbajtur fanellën e klubit që sipas tij mbart një histori të jashtëzakonshme. Vlahovic deklaroi se rrugëtimi i tij me Juventusin përfundon, duke përmendur vitet intensive të kaluara me fitore, gola dhe momente të vështira, dhe se gjithmonë është përpjekur të japë maksimumin sa herë ka zbritur në fushë.
Ai falënderoi Juventusin, Andrea Agnellin, John Elkann, familjen e klubit, stafin që punon në prapaskenë, trajnerët dhe mbi të gjitha shokët e skuadrës, duke theksuar se kanë ndarë më shumë se 90 minuta në fushë dhe se disa momente do të mbeten me të për gjithë jetën. Vlahovic shprehu mirënjohjen për Torinon, qytetin që e priti dhe që për të u bë shtëpi, duke thënë se atje u rrit si futbollist dhe si njeri. Ai falënderoi gjithashtu tifozët e Juventusit për përkrahjen, koret dhe përqafimet pas golave, duke shtuar se përvojat e përjetuara nuk fshihen dhe se largohet me shumë kujtime dhe bindjen se ka lënë një pjesë të vetes atje. Mesazhi përfundon me fjalët “Fino alla fine” dhe firmën “Dusan”.
