Agjencia e Mbikëqyrjes në Sistemin e Ekzekutimit të Vendimeve Penale (AMSEVP) njofton se, në vijim të kontrolleve të kryera në institucione të ekzekutimit të vendimeve penale, sot më 16.09.2026, në orët e para të mëngjesit është ushtruar një kontroll në IEVP Durrës. Gjatë kontrollit në dhomën ku ishin të akomoduar të burgosurit N. K., P. M. dhe E. H., janë konstatuar një aparat celular dhe një karikues.
Pas përfundimit të veprimeve të para procedurale nga AMSEVP, është kryer arrestimi në flagrancë i të burgosurit P. M. për veprën penale “Futja ose mbajtja e sendeve të ndaluara në institucionin e ekzekutimit të vendimeve penale”, të parashikuar nga neni 324/a i Kodit Penal.
Në gjendje të lirë janë proceduar për veprën penale “Moskallëzimi i krimit”, e parashikuar nga neni 300 i Kodit Penal, dy shtetas të burgosur: N. K. dhe E. H. Po ashtu, janë proceduar në gjendje të lirë katër shtetas me detyrë punonjës policie në IEVP Durrës — A. S., A. C., S. M. dhe I. S. — për veprën penale “Shpërdorimi i detyrës”, e parashikuar nga neni 248 i Kodit Penal.
Materialet procedurale të përgatitura nga AMSEVP do të dërgohen për veprime të mëtejshme në Prokurorinë Pranë Gjykatës së Shkallës së Parë të Juridiksionit të Përgjithshëm Durrës.
AMSEVP bën thirrje që qytetarët dhe mediat të denoncojnë çdo rast të abuzimit apo shkeljes së detyrës nga ana e punonjësve të strukturave. Denoncimet mund të bëhen përmes numrit të gjelbër 044 20 40 20 ose duke dërguar email në adresën [email protected].
Top Channel
