Federica Mogherini, aktualisht Rektore e Kolegjit të Evropës dhe ish-Përfaqësuese e Lartë e BE-së për Politikën e Jashtme dhe Sigurinë, është ndaluar në Bruksel si pjesë e një hetimi për mashtrim që përfshin Kolegjin e Evropës dhe Shërbimin e Veprimit të Jashtëm të BE-së (EEAS), raportuan mediat belge.
Sipas gazetës Le Soir, sot janë kryer kërkime në shërbimin diplomatik të Bashkimit Evropian në Bruksel dhe në disa ndërtesa të Kolegjit të Evropës në Bruges. Në total, janë arrestuar tre persona, përfshirë Mogherinin.
Faktet e kontestuara datojnë nga periudha 2021–2022, dhe akuzat përfshijnë mashtrimin në dhënien e kontratave publike, korrupsionin, konfliktin e interesit dhe shkeljen e sekretit profesional.
Hetimi përqendrohet në dyshimet për favorizim dhe konkurrencë të padrejtë në dhënien nga shërbimi diplomatik i BE-së të një programi trajnimi nëntëmujor për diplomatët e ardhshëm evropianë, të njohur si Akademia Diplomatike e Bashkimit Evropian, për Kolegjin e Evropës. Hetuesit po përpiqen të përcaktojnë nëse Kolegji ose përfaqësuesit e tij ishin të informuar paraprakisht për kriteret e përzgjedhjes si pjesë e procedurës së tenderit.
Zyra e Prokurorit Publik Evropian, organ i pavarur i BE-së përgjegjës për luftimin e mashtrimit kundër fondeve të BE-së, kishte kërkuar më parë heqjen e imunitetit që gëzonin disa të dyshuar, kërkesë kjo që u miratua përpara operacionit policor./Corriere della Serra
