Operacioni policor i koduar “Stolen Gold” në Fier zbërtheu një skemë trafiku dhe tregtimi të sendeve me vlerë, të dyshuara si të vjedhura jashtë vendit. Në kuadër të veprimeve u ndalua 27-vjeçari D. S., banues në fshatin Kreshpan, Fier, ndërsa u shpall në kërkim 45-vjeçari B. A., banues në Kraps, Fier, të dy të dyshuar për sigurimin në mënyrë të kundërligjshme të bizhuterive ari dhe argjendi, orëve të markave të ndryshme dhe objekteve të tjera me interes ekonomik, të përfituara, sipas hetimeve, nga vjedhje kryesisht në Itali dhe Greqi, dhe më pas kontrabanda dhe tregtim në Shqipëri.
Sipas njoftimit, mallrat e vjedhura trafikonin drejt tregut vendas dhe shiteshin në subjekte argjendarie në Fier dhe Lushnjë. Si pjesë e hetimit u proceduan penalisht shtetasit administratorë të shtatë subjekteve argjendarie: D. H., 45 vjeç; E. Gj., 38 vjeç; A. Sh., 35 vjeç (të tre banues në Fier) dhe M. S., 39 vjeç; A. K., 62 vjeç; B. B., 65 vjeç; J. D., 41 vjeçe (të katërt banues në Lushnjë). Këta dyshohen se blinin dhe tregtonin sende të dyshuara si të vjedhura dhe dispononin mallra pa dokumentacion ligjor të origjinës, si dhe sende të dyshuara si mall kontrabandë.
Gjatë kontrolleve u sekuestruan 15 kg e 259 gramë ari, 4 kg e 281 gramë argjend, 612 ora të markave të ndryshme, 13 varëse me gurë diamanti, sende të dyshuara me vlerë artistike e kulturore, para në lekë dhe euro, aparate celularë, DVR dhe sende të tjera. Vlera paraprake e sendeve të sekuestruara është rreth 2 milionë euro. Në banesën e D. S. u gjetën dhe sekuestruan bizhuteri, ora, sende të dyshuara me vlerë artistike dhe kulturore, si dhe fishekë arme gjahu. Në banesën e B. A. u sekuestruan ora, bizhuteri ari dhe argjendi, dhe një shkop gome i ngjashëm me atë të Policisë.
Hetimet u zhvilluan nga Seksioni për Hetimin e Krimeve Ekonomike dhe Financiare në DVP Fier, në bashkëpunim me strukturat e Hetimit të Krimit dhe komisariatet e Fierit e Lushnjës, nën drejtimin e Prokurorisë së Fierit, pas një hetimi disamujor me metoda speciale. Hetimet vazhdojnë për identifikimin e personave të tjerë të përfshirë, ndërsa materialet procedurale i janë përcjellë Prokurorisë së Fierit për veprime të mëtejshme.
