Kristian Prenga ishte vetëm pak minuta larg një prej surprizave më të mëdha në historinë e boksit, por përvoja dhe klasi i Anthony Joshua-s bënë diferencën. Ish-kampioni britanik u rikthye nga një raund i parë katastrofik për të fituar me nokaut në raundin e dytë, në një duel dramatik që mbajti në ankth mijëra tifozë në Xhedah dhe miliona para ekranit.
Në tre minutat e para askush nuk e priste atë që ndodhi: Prenga hyri në ring pa komplekse dhe dominoi plotësisht Joshua-n. Me seri goditjesh të fuqishme ai vuri britanikun në vështirësi të mëdha, duke e rrëzuar disa herë gjatë raundit të parë. Joshua u shpëtua nga përvoja, këmbëngulja dhe gongu; raundi i parë ishte pa diskutim në favor të shqiptarit. Arena mbeti e shtangur ndërsa Prenga kontrolloi ritmin, imponoi forcën dhe dha një demonstrim të nivelit të lartë.
Por në raundin e dytë gjithçka ndryshoi. Joshua u rikthye me një qasje më të qetë dhe më të kujdesshme, duke shfrytëzuar përvojën për të gjetur distancën dhe për të goditur me kombinime më të sakta. Prenga provonte të ruante të njëjtin ritëm, por gradualisht filloi të humbiste terren përballë reagimit të kundërshtarit.
Në momentin vendimtar, Joshua goditi me një e djathtë të fuqishme që lëkundi Prengën. Pasoi një seri goditjesh dhe një tjetër e djathtë e pastër e dërgoi shqiptarin në tapet. Arbitri ndërhyri menjëherë dhe ndali sfidën, duke i dhënë fitoren me nokaut Joshua-s.
Pavarësisht humbjes, Kristian Prenga largohet nga përballja me kokën lart. Ai i dhuroi Anthony Joshua-s një nga raundet më të vështira të karrierës së tij dhe tregoi se mund të rivalizojë me emrat më të mëdhenj të peshave të rënda. Për Joshua-n, kjo fitore e rikthen fuqishëm në garën për duelet më të mëdha të divizionit, ndërsa për Prengën mbetet krenaria e një paraqitjeje që për pak çaste bëri të besonte se mrekullia shqiptare ishte pranë.
