Të paktën tetë persona kanë humbur jetën nga përmbytjet e fuqishme që preken disa fshatra në Nepal, ndërsa autoritetet kanë dërguar helikopterë për të ndihmuar në operacionet e kërkim-shpëtimit. Përmbytjet kanë shkaktuar dëme të mëdha në rrugë, ura dhe objekte të infrastrukturës energjetike, veçanërisht në zonat pranë kufirit me Tibetin, dhe autoritetet paralajmërojnë se numri i viktimave mund të rritet.
Në zonat Siapru Besi dhe Timure, në sektorin malor të Rasuwa-s, niveli i ujërave ishte aq i lartë sa helikopterët nuk kanë mundur të ulen, prandaj zyrtarët kanë urdhëruar banorët që jetojnë përgjatë lumit Bhote Kosi të largohen drejt zonave më të larta. Komandanti i sektorit, Narendra Pariyar, paralajmëroi për mundësinë e viktimave të tjera dhe dëmeve të mëdha materiale, ndërsa ekipet e shpëtimit po përpiqen të vlerësojnë situatën në terren.
Një dëshmitar tha se gjithçka ndodhi papritur: banorët dëgjuan një shpërthim të fortë dhe më pas njerëzit nisën të bërtisnin dhe të largoheshin me vrap. Postime në rrjetet sociale dhe disa pamje të shpërndara treguan për një rritje të shpejtë të ujit që shkaktoi shkatërrim të gjerë në zonë.
Përtej kufirit, në Tibet janë raportuar gjithashtu viktima dhe persona të zhdukur pas një rrëshqitjeje dheu në një pikë kalimi mes Kinës dhe Nepalit. Agjencia zyrtare kineze Xinhua raportoi se rrëshqitja e dheut goditi zonën e Girongut (Gyirong), duke dëmtuar rrugët, komunikimet dhe furnizimin me energji elektrike në distriktin Shigatse. Presidenti kinez Xi Jinping ka kërkuar përpjekje maksimale për gjetjen dhe shpëtimin e personave të zhdukur dhe forcimin e sistemeve të paralajmërimit të hershëm.
Ministria e Energjisë e Nepalit bëri të ditur se rreth 430 megavat energji elektrike janë prekur nga përmbytjet, kryesisht për shkak të dëmtimeve në hidrocentrale. Policia dhe ushtria nepaleze janë angazhuar në operacionet e kërkim-shpëtimit, ndërsa autoritetet kanë urdhëruar banorët e zonave të ulëta të zhvendosen në vende më të sigurta.
Shkaku i saktë i përmbytjeve nuk është përcaktuar ende. Vlen të përmendet se lumi Bhote Kosi ishte përfshirë edhe vitin e kaluar nga një përmbytje e fuqishme që shkaktoi nëntë viktima dhe 24 të zhdukur; ajo fatkeqësi u atribuuar nga një agjenci rajonale e monitorimit të klimës shpërthimit të një liqeni akullnajor në Tibet.
