Egnatia ka zyrtarizuar rinovimin e kontratës me sulmuesin Alessandro Albanese, duke e lidhur atë me klubin rrogozhinas deri në verën e vitit 2028. Kampionët shqiptarë vendosën të vazhdojnë bashkëpunimin me një prej lojtarëve kryesorë të skuadrës, i cili tashmë ka fituar vend si titullar dhe konsiderohet një nga liderët e ekipit.
Për të prezantuar rinovimin, klubi përdori një ide të frymëzuar nga Bajerni i Mynihut, duke publikuar një video ku Albanese përshkruhet me një sërë epitetesh: “Ai është një artist. Ai është inspirues. Ai është magjistar. Ai është një gjeni. Ai është një nga ne”. Në materialin promovues u shfaq edhe videoja e klubit si pjesë të prezantimit të kontratës së re.
Albanese iu bashkua Egnatias në fund të merkatos së verës së kaluar dhe që atëherë është shndërruar në një anëtar themelor të formacionit. Statistikisht, ai ka regjistruar 51 paraqitje me fanellën e klubit, ku ka realizuar 14 gola dhe ka dhënë 4 asistime. Edhe fillimi i këtij sezoni ka qenë pozitiv: në 10 ndeshje të luajtura deri tani, Albanese ka kontribuar me 5 gola dhe 3 asistime, shifra që sipas klubit konfirmojnë rëndësinë e tij për skuadrën kampione.
Me rinovimin deri në vitin 2028, Egnatia siguron shërbimet e një prej pikave të saj kryesore për sezonet e ardhshme, duke synuar të ruajë stabilitetin në sulm dhe vazhdimësinë e projektit sportiv. Kontrata e re mbetet pjesë e strategjisë së klubit për të mbajtur brenda skuadrës lojtarët kyç pas rrugëtimit që solli titullin kampion.
