Një shpërthim i fuqishëm i një kamioni të mbushur me eksploziv pranë një stacioni policor në qytetin Cúcuta, afër kufirit me Venezuelën, ka plagosur 14 persona, vetëm pak ditë para marrjes së mandatit të presidentit të zgjedhur Abelardo de la Espriella. Autoritetet raportojnë se mes të lënduarve janë 11 efektivë policie dhe tre civilë; dy policë ndodhen në gjendje kritike dhe po luftojnë për jetën, sipas guvernatorit të departamentit Norte de Santander, William Villamizar.
Qeveria në Bogota akuzoi Ushtrinë Nacionalçlirimtare (ELN) për përgjegjësi të sulmit. Ministri i Mbrojtjes, Pedro Sanchez, i përshkroi autorët si “narkoterroristë” dhe njoftoi një shpërblim prej mbi 64 mijë dollarësh për informacione që çojnë në arrestimin e tyre. Kombet e Bashkuara gjithashtu dënuan sulmin, duke theksuar se ngjarja ka përhapur frikë dhe pasiguri te banorët e zonës.
Ngjarja vjen në një periudhë të tensionuar politike, me De la Espriella të planifikuar të marrë detyrën më 7 gusht, duke zëvendësuar Gustavo Petro. Presidenti i zgjedhur dënoi sulmin si “akt të tmerrshëm dhe të dhunshëm”, deklaroi se terrorizmi nuk do të frikësojë Kolumbinë dhe premtoi vazhdimin e luftës kundër grupeve të armatosura. Ai ka njoftuar se do të japë fund negociatave të paqes me grupet e armatosura, bisedime të nisura nga administrata Petro.
Bisedimet me ELN-në ishin ndërprerë në janar 2025, pas një ofensivë të grupit në verilindje të vendit ku u vranë mbi 100 persona. De la Espriella ka premtuar të forcojë përgjigjen ndaj guerilëve dhe organizatave të trafikut të drogës, me mbështetjen e Shteteve të Bashkuara dhe në bashkëpunim me Izraelin.
Për shkak të shqetësimeve për sigurinë, ceremonia e inaugurimit është zhvendosur nga Bogota në qytetin Cali. Rreth 11 mijë ushtarë dhe policë do të angazhohen për të garantuar sigurinë në tokë, ajër dhe det. Gjatë fushatës, Kolumbia u përball me një valë dhune politike, përfshirë sulme me bomba, dronë të pajisur me eksploziv dhe sulme ndaj forcave të sigurisë; De la Espriella ka deklaruar se ekzistojnë plane atentati ndaj tij. Presidenti në largim, Gustavo Petro, ndodhet për vizitë në Kubë dhe deri tani nuk ka reaguar publikisht për sulmin.
