Një akuarel i rrallë i Pikasos, i vjedhur nga një galeri në Milwaukee në vitin 2018, u gjet pas tetë vitesh brenda një apartamenti të boshatisur nga pronari i tij. Bill DeLind, i cili mendonte se vepra ishte humbur përgjithmonë, u njoftua kur Tim Dertz e telefonoi dhe i kërkoi të shikonte diçka që kishte gjetur gjatë pastrimit të apartamentit. DeLind menjëherë e njohu akuarelin e vjedhur “Torero”, një nga 30 punimet e njohura si të nënshkruara nga Pikaso.
DeLind tha se ishte i tronditur: “Isha i shokuar, nuk kisha fjalë. Ishte një moment tronditës për mua”. Ngjitësi nga kompania e tij, DeLind Fine Art Appraisals, ishte ende në pjesën e pasme të veprës, ashtu siç ishte vendosur në vitin 2018, çka konfirmoi autenticitetin e saj. “Ishte me të vërtetë ai punim”, tha DeLind.
Departamenti i Policisë së Milwaukee njoftoi se afati i parashkrimit për vjedhjen dhe krimet e pronës është përgjithësisht gjashtë vjet, por çështja mbetet nën hetim. Caroline Clancy, një zëdhënëse e FBI-së në Milwaukee, nuk pranoi të komentojë.
Vitin kur u vodh, vlera e punimit ishte vlerësuar midis 35,000 dhe 50,000 dollarëve, sipas DeLind. Ai vlerësoi se vlera nuk është ndryshuar shumë që atëherë, por me historinë e rikthimit mund të jetë më afër 50,000 dollarëve tani. Veprën e artit e mban në posedim policia e Milwaukee-t, ndërsa klienti që e kishte porositur për shitje në galeri po zgjidh çështjen me kompaninë e tij të sigurimeve, tha DeLind.
DeLind tha se ish-ortaku i tij, i cili vdiq në shkurt, ishte thellësisht i prekur nga vjedhja e vitit 2018 dhe telefononte policinë çdo vit në përvjetorin e krimit, duke i kërkuar atyre ta ripublikonin rastin me shpresën që vepra e Pikasos të gjendej. Për rikthimin e punimit ai tha se do të kishte qenë i gëzuar: “Ai do të ishte shumë i lumtur për këtë. Ishte diçka e veçantë për të”.
