Eksperti i kriminalistikës Ervin Karamuço komentoi vendimin e Hagës për ish-liderët e UÇK-së, duke e përshkruar procesin si të orkestruar për t’i bërë qejfin Rusisë dhe si një “lojë ruso-sllave”. Ai deklaroi se shumica e dëshmitarëve janë spiunë të deklaruar e të hetuar në kohën e luftës, pasi në atë periudhë u hapën regjistra dhe u mblodhën të dhëna për bashkëpunimin me forcat serbe dhe shërbimin sekret BIA. Sipas Karamuços, këta spiunë përfunduan misionin e tyre duke dhënë dëshmi në Hagë.
Ai tha se përmes këtyre dëshmive është tentuar të paraqitet lufta çlirimtare si një luftë civile, dhe për këtë, sipas tij, ka pasur një “ushtri” njerëzish të gatshëm ta çonin misionin deri në fund dhe të vendosnin prapa hekurave përfaqësues të lartë. Karamuço shtoi se rreth 90% e këtyre aktorëve kanë qenë shqiptarë dhe e cilësoi këtë si “gjë më e shëmtuar”. Ai theksoi se shumë dëshmitarë janë të klasifikuar si sekretë dhe se nuk ka pasur dënime për serbët gjatë këtyre viteve, duke sjellë në vëmendje qëndrimin e presidentit serb Aleksandar Vuçić, i cili sipas tij kishte kërkuar maksimumin.
Eksperti u shpreh se ka pasur një strategji fillestare për të korrigjuar, siç tha, gabimin e Boris Jelcinit që “la Kosovën”. Ai përmendi ekzistencën e një “hambari” të madh me spiunë, disa prej të cilëve ende nuk janë dekonspiruar, dhe pretendoi se disa prej tyre kanë marrë trajtime speciale. Karamuço vuri në dyshim efikasitetin e diplomacisë së Kosovës në këtë çështje, duke deklaruar se nuk ka pasur një diplomaci të ndezur; ai përmendi marrëdhëniet e tensionuara diplomatike, si mungesën e komunikimit midis ambasadores së Kosovës dhe asaj të Shqipërisë në festa kombëtare, dhe se kryeministri Albin Kurti shkoi më shumë në Maqedoni sesa në Shqipëri.
Ai nënvizoi se për shkak të këtij konteksti “duhej bërë një sakrificë”. Më tej, Karamuço tha se Prokuroria kishte marrë si provë librin “Kthesa e Madhe” të Jakup Krasniqit dhe e kishte paraqitur si dokument që lidh udhëheqësit politik dhe të zbulimit me veprime si vrasje e tortura.
