Në gjyqin në Gjykatën Administrative kundër prokurorit Ols Dado, kryetari i Bashkisë së Tiranës, Erion Veliaj, para trupës gjykuese depozitoi vendimin e zbardhur të Gjykatës Kushtetuese lidhur me çështjen e tij. Veliaj deklaroi se Kushtetuesja ka evidentuar mangësi serioze kushtetuese në mënyrën se si është justifikuar kufizimi i lirisë së tij.
Ai nënvizoi se vendimi i zbardhur konstatoi se Gjykata e Lartë nuk kishte arsyetuar në mënyrë kushtetuese proporcionalitetin e masës së paraburgimit në raport me mandatin e tij si kryetar bashkie dhe nuk kishte trajtuar siç duhet pretendimet për cenimin e dinjitetit nga mbajtja në kabinën e xhamit. Veliaj citoi gjithashtu se një nga gjyqtaret e Gjykatës Kushtetuese arriti në përfundimin se, bazuar në provat e administruara, nuk rezulton të jetë arritur standardi kushtetues i dyshimit të arsyeshëm se ai ka kryer vepër penale.
Ai theksoi se këto konstatime nuk janë pasoja abstrakte, duke kujtuar se ndodhet në paraburgim prej 16 muajsh dhe se vetë Kushtetuesja ka evidentuar mangësi serioze në justifikimin e kufizimit të lirisë së tij. Për këtë arsye, Veliaj vlerësoi se gjyqi administrativ ka një rëndësi që shkon përtej interesit të tij personal apo atij të z. Ols Dado.
Sipas tij, procesi duhet të përcaktojë nëse një person, për të cilin vihet në diskutim ligjshmëria e emërimit, mund të ushtrojë kompetenca që mund të ndërhyjnë në kufizimin e lirisë së një qytetari, në cenimin e dinjitetit dhe në pamundësimin e ushtrimit të një mandati të fituar drejtpërdrejt nga vota e qytetarëve të Tiranës. Në thelb, tha ai, çështja prek besimin te shteti i së drejtës dhe te demokracia kushtetuese.
Veliaj informoi gjykatën se po vë në dispozicion vendimin e Gjykatës Kushtetuese si një zhvillim me rëndësi për këtë proces.
