Asistentja personale e aktorit Matthew Perry, Kenneth Iwamasa, 60 vjeç, u dënua me 41 muaj burg federal për komplot për shpërndarje ketamine që çoi në vdekjen e aktorit në tetor 2023. Iwamasa pranoi fajësinë, ndërsa prokurorët thanë se ai bashkëpunoi me dy mjekë për t’i siguruar Perry-t mbi 50 mijë dollarë ketaminë vetëm në javët para vdekjes, pavarësisht se nuk kishte asnjë trajnim mjekësor.
Perry u gjet i pajetë në vaskën me ujë të nxehtë në shtëpinë e tij në Los Angeles; autoritetet mjekësore konfirmuan se aktori humbi jetën nga efektet akute të ketaminës, ndërsa mbytja u rendit si faktor kontribuues. Hetimet treguan se Iwamasa i kishte bërë Perry-t disa injeksione me ketaminë, përfshirë edhe ditën kur aktori ndërroi jetë.
Në sallën e gjyqit në Los Angeles, Iwamasa kërkoi falje para familjes së aktorit: “Më vjen shumë keq nga të gjithë ju. Do të pendohem përgjithmonë për veprimet e mia,” dhe shtoi se shpreson që rasti i tij të shërbejë si paralajmërim për të tjerët. Gjyqtarja Sherilyn Peace Garnett vuri në dukje se Iwamasa ishte në dijeni të plotë të betejës së Perry-t me varësinë dhe kritikoi përpjekjet e tij për të fshehur prova pas vdekjes.
Përveç dënimit me burg, Iwamasa u urdhërua të paguajë një gjobë prej 10 mijë dollarësh dhe do të qëndrojë dy vjet nën mbikëqyrje pas lirimit. Familjarët e Matthew Perry reaguan ashpër; motra Caitlin Morrison tha se nuk kishte “asnjë simpati” për Iwamasën, ndërsa e ëma, Suzanne Morrison, tha se ai kishte detyrën ta mbronte aktorin nga droga dhe jo ta ndihmonte të siguronte furnizime të paligjshme.
Çështja përfshiu gjithsej pesë të pandehur, të cilët pranuan fajësinë për rolet e tyre në furnizimin e Perry-t me drogë. Në prill, Jasveen Sangha, e njohur si “Mbretëresha e Ketaminës”, u dënua me 15 vite burg, ndërsa mjeku Salvador Plasencia mori një dënim prej 30 muajsh burg për furnizimin e Perry-t me ketaminë në javët para vdekjes së tij.
