Mbrëmjen e djeshme, pas tubimit paqësor në bulevardin “Dëshmorët e Kombit”, protesta mori një tjetër karakter pasi turma marshoi deri në komisariatin nr.3. Një numër i konsiderueshëm protestuesish vendosën të qëndrojnë përpara këtij institucioni të Policisë së Shtetit, pasi aty ndodhen disa nga të arrestuarit pas incidenteve që ndodhën të enjten para dhe gjatë seancës plenare në Kuvend.
Gjatë qëndrimit para komisariatit, disa protestues, përfshirë edhe persona të maskuar, sulmuan dhe vandalizuan ambientet e komisariatit, duke thyer xhamat dhe orenditë që ndodheshin në holl. Veprimet përfshinin shkatërrim të pjesëve të brendshme të institucionit, ndërsa turma qëndroi rreth ndërtesës me kërkesa lidhur me lirimin e të arrestuarve.
Top Channel ka siguruar prononcimin e një prej protestuesve, i cili tha: “Dhuna e ndodhur sot nuk na përfaqëson të gjithë protestuesit, se nuk fituam gjë nga kjo. Ama ne ngritëm zërin. Duam që ne të dëgjohemi dhe të kemi një rezultat, një paqe.” I njëjti protestues u shpreh gjithashtu për rastin konkret të një të arrestuari: “Unë dua të flas për Everestin, që është një student, i arrestuar bashkë me babanë e tij. Ka qenë paqësor, nuk ka ushtruar asnjë dhunë. Unë mendoj se duhet të dalë. Disa kanë qenë edhe në lokal.”
Nga raportimi rezulton se prania e protestuesve para komisariatit lidhej drejtpërdrejt me kërkesën për trajtim dhe lirimin e personave të ndaluar pas incidenteve të ditëve të fundit në kryeqytet. Ndërkaq, shumica e pjesëmarrësve në tubim fillimisht kishin marrë pjesë në mbledhjen paqësore në bulevard, por pjesa e marshit drejt komisariatit çoi në konfrontime dhe dëme materiale në ambientet e institucionit. Top Channel.
