Një ekip studiuesish nga Universiteti i Kembrixhit ka krijuar, me ndihmën e inteligjencës artificiale, një lloj të ri vaksine që synon të ofrojë mbrojtje ndaj një game të gjerë virusesh dhe potencialisht të parandalojë pandemitë e ardhshme. Sipas shkencëtarëve, për herë të parë përbërësi kryesor i një vaksine është projektuar tërësisht nga AI dhe më pas është testuar te njerëzit. Vaksina është konceptuar për të mbrojtur kundër të gjithë familjes së koronaviruseve, duke përfshirë variantet e Covid-19 dhe viruset që qarkullojnë te kafshët, por që mund të shkaktojnë epidemi te njerëzit.
Ndryshe nga vaksinat tradicionale, që bazohen në një variant ekzistues të virusit, studiuesit përdorën kode gjenetike nga koronaviruse të ndryshme. Inteligjenca artificiale analizoi këto të dhëna dhe krijoi një “super-antigen” që synon të trajnojë sistemin imunitar për t’u përgjigjur gjithashtu ndaj varianteve të reja ose ndaj virusëve që mund të kalojnë nga kafshët te njerëzit. Rezultatet fillestare të testeve te njerëzit tregojnë një reagim imunitar modest, por ekspertët e përshkruajnë teknologjinë si shumë premtuese.
Ekipi i Kembrixhit po punon edhe për vaksina universale të tjera, përfshirë vaksina kundër gripit sezonal, gripit të shpendëve H5N1 dhe etheve hemorragjike virale, përfshirë Ebolën. Në fazën e parë të testimeve të kësaj vaksine të projektuar nga AI janë përfshirë 39 persona; këto testime synonin të vlerësonin nëse vaksinat janë të sigurta për përdorim te njerëzit. Një studim i dytë, me rreth 200 pjesëmarrës, pritet të japë një pamje më të qartë mbi kapacitetin e vaksinës për të trajnuar në mënyrë efektive sistemin imunitar të njeriut.
Raporti përmend se qëndrueshmëria e përgjigjes imunitare dhe efekti mbrojtës ndaj varianteve të reja do të vlerësohen më tej në studimet e ardhshme, ndërsa zhvillimet lidhur me vaksinat universale kundër koronavirusëve dhe të tjera mbeten në progres.
