Ushqimi i pashëndetshëm, i kontaminuar me baktere, viruse, parazitë ose kimikate të dëmshme, vlerësohet të shkaktojë rreth 1.5 milion vdekje çdo vit në mbarë botën, njofton Organizata Botërore e Shëndetësisë (OBSH). Drejtori i Përgjithshëm i OBSH-së, Tedros Adhanom Ghebreyesus, theksoi se “Siguria ushqimore nuk është një çështje abstrakte: ajo ka të bëjë me çdo vakt, çdo familje, çdo ditë” në një mesazh përpara Ditës Botërore të Sigurisë Ushqimore, që shënohet më 7 qershor.
Sipas analizës së fundit të OBSH-së, e cila ka vlerësuar 42 rreziqe të lidhura me ushqimin në 194 vende gjatë periudhës 2000–2021, rreth 866 milionë persona sëmuren çdo vit si pasojë e konsumit të ushqimit të pasigurt. Fëmijët nën pesë vjeç janë grupi më i rrezikuar: probabiliteti që të preken nga sëmundje të shkaktuara nga ushqimi i kontaminuar është pothuajse tre herë më i lartë se tek të rriturit.
Edhe pse barra globale e sëmundjeve nga ushqimi i pasigurt është ulur që nga viti 2000, pabarazitë mbeten të theksuara. Afrika dhe Azia Juglindore përbëjnë rreth tre të katërtat e rasteve dhe rreth 60% të vdekjeve globale nga këto sëmundje. OBSH-ja nënvizon se shumica e sëmundjeve shkaktohen nga rreziqe biologjike—baktere, viruse dhe parazitë—ndërsa një pjesë e konsiderueshme e vdekjeve lidhet me substanca kimike të rrezikshme në ushqim. Arseniku inorganik dhe plumbi përmenden si faktorë kryesorë që rrisin rrezikun për sëmundje kardiovaskulare dhe kancer.
Ekspertët paralajmërojnë se situata po përkeqësohet për shkak të ndryshimeve klimatike dhe rritjes së rezistencës antimikrobike, duke e bërë trajtimin e infeksioneve më të vështirë. “Të dhënat tregojnë se sëmundjet nga ushqimi i pasigurt jo vetëm që vazhdojnë, por po përkeqësohen,” tha eksperti i OBSH-së për sigurinë ushqimore, Yuki Minato.
Përveç pasojave shëndetësore, OBSH vlerëson edhe ndikimin ekonomik: këto sëmundje shkaktojnë humbje të mëdha në produktivitet, të cilat arrijnë në rreth 647 miliardë dollarë në vit. Tedros Adhanom Ghebreyesus theksoi se të dhënat tregojnë përmasën reale të problemit dhe nevojën për masa urgjente në sigurinë ushqimore në nivel global.
