Uran Ferizi, ambasador i Shqipërisë në Mbretërinë e Bashkuar, në një shkrim për The Spectator shpreh shqetësim se politikanë britanikë po përdorin emrin “shqiptar” si mjet retorik, duke stigmatizuar komunitetin dhe dëmtuar imazhin e Britanisë. Ai rrëfen historinë e tij personale: mbërriti në Britani si emigrant 17-vjeçar, i fshehur në një kamion pas arratisjes me skaf për në Itali; punoi në restorant dhe supermarket për katër vite, më pas u pranuar për të studiuar matematikë në Universitetin e Oksfordit. Ferizi pyet nëse Britania vazhdon të vlerësojë akoma histori të tilla integrimi.
Si diplomati i Shqipërisë, ai vë në dukje se ambasadorët britanikë flasin hapur për mangësitë e vendit të tij, ndërsa ai ndjen nevojën t’u kujtojë lexuesve virtytet historike shqiptare: mikpritjen e përmendur nga Lord Bajroni, vuajtjen nën diktaturën komuniste dhe rindërtimin e shpejtë pas saj. Ai rikujton edhe rolin unik të familjeve shqiptare gjatë Luftës së Dytë Botërore, që strehuan hebrenjtë dhe nuk i dorëzuan tek nazistët, duke theksuar besën dhe mikpritjen si vlera kombëtare.
Ambasadori kritikon sistemin e vizave britanike për shqiptarët, që sipas tij është i kushtueshëm dhe i komplikuar: tarifa të larta, detyrimi për të patur vizitë në një zyrë të vendosur në periferi të Tiranës, formularë të ndërlikuar dhe ndonjëherë vetëm viza gjashtëmujore. Ai kundërvë këtë me praktikat e Italisë dhe Gjermanisë, ku mekanizmat për lëvizje legale funksionojnë më mirë dhe shqiptarët nuk stigmatizohen. Si rrjedhojë, shumë shqiptarë drejtohen tek trafikantët, përfundojnë në ferma kanabisi dhe më pas në burg.
Ferizi tregon vizitat në burgun Wormwood Scrubs, ku stafi e përshkroi komunitetin shqiptar si ndër më të sjellshmit; shumica janë djem në të njëzetat, kryesisht të dënuar për drogë, që kishin marre hua për të paguar trafikantët dhe nuk kishin ardhur me vizë. Ai paralajmëron se politikat që synojnë sensacionin mediatik vetëm krijojnë problemin që premtojnë të zgjidhin. Përmend kontributet e shqiptarëve në Britani: ndërtim, riparime, profesionet mjekësore, pagesat e taksave dhe fëmijët që flasin anglisht në shtëpi. Ferizi shprehet se Britania dhe Oksfordi e formësuan dhe se vendi vlen të mbrohet, ndoshta edhe nga vetja.
