Trajneri i Barcelonës, Hansi Flick, në konferencën për shtyp para ndeshjes me Athletic Club u përqendrua te situata rreth Julián Álvarez, një temë që pritej të dominonte diskutimin. Para kësaj ai zhvilloi një takim me presidentin Joan Laporta dhe drejtorin sportiv Deco në Ciutat Esportiva, ku në qendër ishte edhe mundësia e transferimit të sulmuesit argjentinas nga Atlético Madrid. Megjithatë, Flick tregoi rezervë dhe shmangu komentet direkte mbi emrin e lojtarit.
Trajneri ripërsëriti se qëndrimi i klubit është i qartë, duke cituar fjalët: “Presidenti dha dje një mesazh të qartë. Dhe Deco dhe unë jemi plotësisht dakord me të”. Në përgjigje të pyetjeve të mëtejshme, ai theksoi se nuk dëshiron të flasë për Julián dhe se i intereson vetëm situata e klubit. Flick përmendi po ashtu se Barcelona ka bërë disa transferime të mira këtë merkato dhe se objektivi është i qartë, ndërsa theksoi se klubi duhet të mendojë edhe për të ardhmen, jo vetëm për të tashmen.
Si trajner, Flick pranoi se do të dëshironte të kishte lojtarët më të mirë të mundshëm, por nënvizoi se vendimet duhet të jenë të qëndrueshme në plan afatgjatë: “Sigurisht, si trajner do të thoja: ‘Më sillni lojtarët më të mirë që mund të kem’. Por kjo mund të funksionojë ose jo. Kam besim të plotë te cilësia që kemi aktualisht në skuadër”. Ai gjithashtu vlerësoi punën e drejtuesve gjatë verës, duke thënë se “Klubi dhe Deco po bëjnë një punë të shkëlqyer, sepse po mendojnë edhe për të ardhmen, për tre, katër apo pesë vitet e ardhshme. Kjo është diçka e mirë dhe e stabilizon klubin”.
Ndërkohë, situata e Álvarez mbetet e hapur. Sulmuesi argjentinas nuk u stërvit me Atlético Madrid për shkak të një problemeje personale; nga klubi madrilen u njoftua se lojtari “kaloi një natë të keqe”. Barcelona vazhdon ta monitorojë çështjen, dhe me pak ditë të mbetura deri në mbylljen e merkatos pritet që katalanasit të provojnë deri në fund mundësitë për realizimin e një transferimi, ndërsa raportimet thonë se Álvarez vazhdon të dëshirojë kalimin te Barcelona.
