Pas një telefonate të ashpër midis presidentit amerikan Donald Trump dhe kryeministrit izraelit Benjamin Netanyahu, Departamenti i Shtetit njoftoi se, si rezultat i bisedimeve të udhëhequra nga Shtetet e Bashkuara, përfaqësues të Izraelit dhe Libanit ranë dakord për zbatimin e një armëpushimi. Palët u pajtuan të krijojnë zona piloto ku Forcat e Armatosura të Libanit do të ushtrojnë kontroll ekskluziv, duke përjashtuar aktorët joshtetërorë, me qëllim përmirësimin e sigurisë dhe lehtësimin e rrugës drejt një marrëveshjeje gjithëpërfshirëse.
Izraeli riafirmoi se garantimi i sigurisë dhe integritetit të tij territorial varet nga çarmatosja e Hezbollahut dhe shkatërrimi i infrastrukturës së saj në Liban. U njoftua gjithashtu se diskutimet mes palëve do të rifillojnë përmes kanaleve politike dhe të sigurisë gjatë javës së fundit të qershorit, me synimin e arritjes së një marrëveshjeje përfundimtare.
Sipas raportimeve të Axios, Reuters dhe mediave të tjera, Trump u zemërua me Netanyahu-n për shkak të planeve izraelite për zgjerimin e operacioneve ushtarake në Liban. Gjatë telefonatës, ai thuhet se e quajti Netanyahu-n “të çmendur” dhe i kërkoi të ndalonte përshkallëzimin, duke argumentuar se veprimet izraelite po dëmtonin përpjekjet diplomatike amerikane me Iranin dhe po izolonin Izraelin në arenën ndërkombëtare.
Disa raporte bëjnë të ditur se pas kësaj bisede, Netanyahu hoqi dorë nga planet për sulme më të gjera ndaj Bejrutit. Trump deklaroi publikisht se kishte zhvilluar një bisedë me Netanyahu-n dhe se Izraeli kishte pranuar të ndalte operacionet e planifikuara.
Njoftimi i DASH-it dhe marrëveshja për zonat pilote shënojnë një hap konkret në përpjekjet diplomatike ndërkombëtare për të qetësuar situatën ushtarake midis Izraelit dhe Libanit. Palët synojnë të vazhdojnë dialogun përmes kanaleve zyrtare me qëllim arritjen e një marrëveshjeje të qëndrueshme që adreson shqetësimet e sigurisë së të dyja vendeve.
