Universiteti Europian i Tiranës organizoi këtë javë një diskutim mbi zhvillimet globale dhe rolin e Kinës në arenën ndërkombëtare, me pjesëmarrjen e Ambasadores së Republikës Popullore të Kinës në Shqipëri, Pang Chunxue. Ajo u ndal te rruga e zhvillimit të Kinës, duke theksuar se përparimi ekonomik i vendit mbështetet te puna, reformat dhe investimet afatgjata.
Ambasadorja rikonfirmoi mbështetjen e Kinës për procesin e integrimit evropian të Shqipërisë dhe përmendi bashkëpunimin dypalësh në fushën e arsimit. “Ne po punojmë me Ministrinë e Arsimit të Shqipërisë për të rinovuar marrëveshjen tonë dypalëshe për bashkëpunimin në fushën e arsimit, si dhe për njohjen e ndërsjellë të diplomave dhe certifikatave të të diplomuarve. Shpresoj që të arrijmë një konsensus sa më shpejt, në mënyrë që të promovojmë më tej bashkëpunimin tonë në sektorin e arsimit, jo vetëm përmes shkëmbimit të studentëve dhe bursave, por edhe përmes bashkëpunimit ndërmjet universiteteve”, tha Pang Chunxue.
Për drejtuesit e universitetit, takime të tilla ofrojnë mundësi për të afruar studentët me perspektivat e aktorëve ndërkombëtarë. Blendi Lami, Drejtues i Departamentit të Shkencave Sociale të Aplikuara, vlerësoi se “Kjo përbën një mundësi të vlefshme për studentët dhe stafin akademik që të dëgjojnë drejtpërdrejt nga një përfaqësuese e shquar i diplomacisë kineze dhe të angazhohen me perspektivat e një prej vendeve më me ndikim në botë”.
Takimi përfshiu pyetje dhe diskutime nga studentët, të cilët bënë pyetje mbi zhvillimet ekonomike, politike dhe diplomatike të Kinës dhe morën përgjigje nga ambasadorja. Forumet e tilla janë pjesë e aktivitetit të Universitetit Europian të Tiranës për të sjellë pranë studentëve personalitete të diplomacisë, politikës dhe jetës publike ndërkombëtare dhe për të zhvilluar dialog lidhur me çështje ndërkombëtare dhe bashkëpunim akademik.
