Dogana e Kosovës njoftoi se në pikëkalimin kufitar në Merdarë, që ndan Kosovën nga Serbia, janë zbuluar rreth 1 milion euro të padeklaruara. Zbulimi u realizua gjatë një kontrolli të detajuar të një automjeti, i cili përfshinte Aurel Kazia, efektiv policie nga komisariati nr. 5 në Tiranë.
Kontrolli fillestar u krye përmes një pajisjeje skanuese me rreze X, ku dolën indikacione për një hapësirë të dyshimtë të modifikuar në dysheme. Pas kësaj, Dogana e Kosovës kërkoi asistencë nga zyrtarët e Policisë Kufitare, që ofruan mbështetje teknike me pajisjen fibroskopike. Nga hetimet e kryera, u konfirmua se shuma e dyshuar ishte rreth 1 milion euro, pas së cilës efektivi u arrestua.
