Kryetari i Partisë së Lirisë, Ilir Meta, tha se zgjedhjet e 14 Majit do të jenë historike pasi vendit do i rikthehet demokracia dhe do të rikthehet roli i qytetarëve në vendimarrje si dhe shpresa te të rinjtë.
Përmes një postimi në “Facebook”, Meta thekson se asgjë nuk i ndal dot kandidatët tanë, të primareve për t’u regjistruar, për të konkurruar dhe për të fituar në këto zgjedhje.
“Zgjedhjet e 14 Majit do të jenë historike, sepse do të mbyllin përfundimisht kapitullin e pushtetit monist dhe arrogant, që nuk jep llogari, por vetëm abuzon dhe shpërdoron.
Do të jenë historike sepse do të rikthejnë demokracinë dhe rolin e qytetarëve në vendimmarrje dhe sidomos do të rikthejnë shpresën tek të rinjtë dhe të rejat e Shqipërisë”, shkruan ai.
Ndërkohë, ditën e djeshme pak orë pasi KQZ shpalli publikisht se njihte Lulzim Bashën si kryetar të PD, lideri i partisë së Lirisë, Ilir Meta doli në një konferencë për shtyp.
Ai deklaroi se PL do të hyjë në zgjedhje me listën e saj për këshillat bashkiakë duke e shoqëruar këtë fakt edhe me leximin e disa prej emrave.
Kjo do të thotë se koalicioni i përfolur mes tij dhe Berishës si në zgjedhjet e pjesshme të 6 Marsit nën siglën e Shtëpisë së Lirisë nuk do të realizohet.
