Një 67-vjeçar amerikan, i cili u lidh me shirit ngjitës në sediljen e tij gjatë një fluturimi të American Airlines, ka deklaruar në gjykatë se nuk kujton asgjë nga incidenti që çoi në devijimin e avionit. Ngjarja ndodhi më 3 shtator, kur fluturimi nga Dallas, Teksas, drejt Newark, Nju Xhersi u detyrua të devijonte dhe të kryente një ulje emergjente në aeroportin Thurgood Marshall të Baltimore/Washington. Pas uljes, autoritetet e arrestuan.
Lundeen, i akuzuar për sjellje të çrregullt dhe sulm të shkallës së dytë, u paraqit në seancën gjyqësore të nesërmen dhe u shpreh se nuk kishte dijeni për atë që kishte ndodhur. Tek i janë lexuar akuzat, ai reagoi: “Kam sulmuar një oficer policie? Kështu thotë këtu? Nuk i kam syzet. O Zot, çfarë rrëmuje… Nuk mbaj mend asgjë.”
Sipas dëshmive të disa pasagjerëve, Lundeen kishte bërë komente fyese dhe përdorur gjuhë vulgare gjatë fluturimit. Juan Mejia, ish-punonjës i forcave të rendit dhe një nga pasagjerët që ndihmuan për ta neutralizuar, tha për ABC se 67-vjeçari dyshohet se kishte bërë “komente denigruese” ndaj stafit dhe pasagjerëve të tjerë, përfshirë ofendime raciste dhe homofobike. Një pasagjer tjetër, Richard Olenick, tha për CNN se Lundeen dyshohet se ishte përpjekur të godiste pasagjerin pranë tij dhe një grua që kishte ndërhyrë. Olenick, i cili gjithashtu ndihmoi në kufizimin e lëvizjeve të tij, deklaroi se shiriti ngjitës ia kufizoi ndjeshëm lëvizjet, por nuk e ndaloi plotësisht rezistencën.
Kompania ajrore theksoi se siguria e pasagjerëve dhe e stafit është përparësia kryesore. “Siguria dhe mbrojtja e klientëve dhe anëtarëve të ekipit tonë janë prioriteti ynë kryesor dhe ne nuk tolerojmë dhunën,” tha American Airlines, duke falënderuar stafin për profesionalizmin dhe pasagjerët për mirëkuptimin. Hetimet dhe procedurat gjyqësore ndaj Lundeen vazhdojnë.
