Manchester City zyrtarizoi emërimin e Enzo Marescës si trajner të ri, ndërsa Chelsea publikoi një deklaratë të ashpër ndaj teknikut italian pa e përmendur me emër. Sipas klubit londinez, që në vjeshtën e vitit të kaluar trajneri i kishte bërë me dije se ekzistonte mundësia që ai të pasonte Pep Guardiolën në fund të sezonit. Chelsea thekson se u bë e qartë se ai ishte plotësisht i përqendruar në ndjekjen e kësaj mundësie, pavarësisht se ishte i lidhur me një kontratë afatgjatë që nuk kishte të drejtë ta ndërpriste.
Klubi shprehu zhgënjim për dorëheqjen e papritur të trajnerit në dhjetor 2025, ngjarje që sipas Chelsea-t shkaktoi ndjenjën e tradhtisë dhe vështirësinë për të pranuar se mendja dhe zemra e tij ishin te një klub tjetër, edhe pse ai ishte bashkuar me Chelsea vetëm një vit më parë. Chelsea vuri në dukje se asnjë klub nuk dëshiron të ndryshojë trajnerin në mes të sezonit, por për të mbrojtur lojtarët, tifozët dhe identitetin e klubit, nuk pati tjetër zgjidhje përveç pranimit të dorëheqjes së tij.
Në lidhje me aspektet financiare, Chelsea konfirmoi se ka arritur marrëveshje me Manchester Cityn për pagesën e një dëmshpërblimi prej 17 milionë paundësh për lirimin e Marescës. Klubi njoftoi gjithashtu se është arritur një marrëveshje konfidenciale me vetë trajnerin, i cili do të paguajë gjithashtu një dëmshpërblim.
Deklarata përfundoi me shprehjen e besimit te trajneri i ri i Chelsea-t, Xabi Alonso, të cilin klubi e përshkroi si një trajner me inteligjencë të jashtëzakonshme futbolli dhe integritet të lartë profesional, i aftë për t’i rikthyer klubit sukseset që tifozët presin.
