“The Telegraph” i kushton një reportazh Sokol Hoxhës, 50-vjeçarit i arrestuar së fundi në SHBA pas thuajse tridhjetë vjet arrati. Hoxha dyshohet të ketë vrarë bashkëshorten 19-vjeçare në Belgjikë dhe dy vëllezër në Patos të Shqipërisë në vitin 1997. Pas vrasjeve, ai u largua nga Evropa dhe, sipas hetimeve, mori një identitet të rremë duke u prezantuar si refugjat nga Kosova, çka i mundësoi që të kërkonte azil dhe më pas të siguronte shtetësinë britanike.
Një hetim ndërkombëtar gjashtëvjeçar, i udhëhequr nga Interpol Washington në koordinim me partnerë vendorë dhe ndërkombëtarë, ka çuar në arrestimin e Hoxhës në Kettering, Ohio. Ai ishte subjekt i dy njoftimeve të Interpolit për tre vrasjet. Autoritetet kanë konstatuar se Hoxha mori një identitet të rremë pas largimit nga Belgjika dhe më pas fitoi shtetësi në një vend tjetër evropian me pseudonim; më vonë dyshohet se hyri në SHBA në 2012 dhe mori statusin e qëndrimit të përhershëm ligjor, duke vazhduar të fshehte identitetin e tij të vërtetë për rreth 14 vjet.
Hoxha ishte dënuar në mungesë me 25 vjet burg për vrasjen çift të vëllezërve në Shqipëri. Ai dyshohet gjithashtu se vrau gruan e tij pasi ajo refuzoi kërkesat që të behej prostitutë në Belgjikë. Në hetim kanë marrë pjesë edhe Agjencia Kombëtare e Krimit dhe Ministria e Brendshme britanike, të cilat ndihmuan në përcaktimin e lëvizjeve dhe statusit të tij të imigracionit gjatë kohës që ai jetoi në Mbretërinë e Bashkuar për të paktën një dekadë.
Reportazhi përmend edhe raste të tjera të shtetasve shqiptarë që morën pasaporta britanike me emra të rremë: Avni Metra (dënim në mungesë 25 vjet, më pas ekstradim), Arsim Murati (48 vjeç; fitoi apel kundër heqjes së shtetësisë pavarësisht mashtrimit), Afrim Sinani (erdhi në 1998 si Afrim Pulaj, u ekstradua në 2010) dhe Ilir Kumbaro (dënim në mungesë 15 vjet, u zhduk gjatë lironjes për ekstradim). Artikulli nënvizon bashkëpunimin ndërkombëtar në kapjen e Hoxhës dhe saktëson rrugën e tij nga krimi drejt azilit dhe shtetësisë së rreme.
