Vincenzo Montella priste që Turqia e tij të hynte në ndeshjen e tretë të grupit si kryesuese, por skuadra u ndëshkua dhe do të luajë ndaj SHBA në SoFi Stadium si e eliminuar e grupit. Në konferencën për shtyp para këtij takimi, trajneri nuk e fshehu irritimin ndaj kritikave dhe thirrjeve për largimin e tij. Ai deklaroi se nuk do të japë dorëheqjen, se nuk dorëzohet dhe se ka ende energji e entuziazëm, duke kundërshtuar kërkesat për të hequr dorë nga detyra.
Para se të përgjigjej për pyetjet, Montella mbajti një fjalim mbrojtës për veten dhe për futbollistët, duke refuzuar kritikat që i cilësoi të rënda dhe të pamotivuara. Ai tha: “Këta futbollistë meritojnë më shumë respekt nga sa iu është dhënë, janë krenaria dhe djemtë e një vendi… janë djemtë e mi, djemtë tuaj. Duhen mbrojtur, kritikuar nëse duhet, por kurrë në aspektin personal dhe me tone fyese siç ka ndodhur në ditët e fundit.” Montella u shpreh i indinjuar nga fakti që disa protesta të vogla jashtë hotelit në Los Angeles morën më shumë vëmendje se mbështetja e qindra tifozëve, dhe e përshkroi këtë sjellje si të patolerueshme.
Trajneri gjithashtu përmendi rrugëtimin e ekipit që nga momenti kur mori drejtimin e kombëtares, duke evidentuar arritjet dhe statistikat e Turqisë në këtë botëror. Ai vuri në dukje se ekipi është ndër të parët për aksionet në zonën kundërshtare dhe për shumë tregues të sulmit, por pranoi se ekipi ka dështuar të shënojë: sipas tij, nga 61 gjuajtjet në dy ndeshje, nëse edhe njëri do të kishte përfunduar në portë historia do të ishte ndryshe. Përfundimisht, Montella kërkoi që populli turk t’u qëndrojë pranë dhe paralajmëroi se nuk duhet “të shkatërrohen gjithçka” për shkak të rezultateve të deri tanishme.
