Disa të rinj italianë që kishin ardhur për pushime në Tiranë raportohet se kanë rënë pre e dhunës fizike, sipas mediave italiane, të cilët kanë publikuar edhe foto nga incidenti. Ngjarja, thuhet se ka ndodhur disa ditë më parë në kryeqytet.
Policia e Tiranës sqaroi se rasti, i cili shfaqet edhe në një video ku duket një shtetas italian i dëmtuar lehtë, ka ndodhur rreth orës 22:00 më 29.07.2026 në zonën pas Pallatit të Kulturës. Ngjarja është trajtuar për veprën penale “Plagosja e lehtë me dashje”. Shërbimet e Komisariatit të Policisë Nr. 1 shkuan menjëherë në vendngjarje pas njoftimit nga Salla Operative dhe konstatuan shtetasin italian G.M. me dëmtime të lehta sipërfaqësore. Në vendndodhje ishin edhe dy shokët që e shoqëronin.
Sipas policisë, shtetasi italian mori ndihmën e parë fillimisht nga punonjës të Policisë Bashkiake që ndodheshin në afërsi, dhe më pas u transportua për ndihmë mjekësore. Personeli mjekësor dhe kartela mjekësore treguan se ai ishte i vetëdijshëm, pa rrezik për jetën dhe me dëmtime të lehta në gjymtyrë. Pas ndihmës së parë, ai u largua me dëshirën e tij pa përfunduar ekzaminimet dhe pa njoftuar stafin mjekësor për largimin.
Shtetasi italian nuk pranoi të bëjë kallzim për konfliktin dhe personat që e kishin dëmtuar, ndërsa edhe dy shokët e tij nuk dhanë informacion mbi rrethanat e ngjarjes. Megjithatë, grupi hetimor vijoi veprimet, duke këqyrur pamjet filmike; nga shqyrtimi u konstatua se shtetasi italian ishte përfshirë në një konflikt me një grup të miturish në pjesën e pasme të Pallatit të Kulturës.
Grupi hetimor vazhdon veprimet për zbardhjen e plotë të rrethanave, identifikimin e personave të përfshirë dhe dokumentimin ligjor të rastit.
