Presidenti i Shteteve të Bashkuara, Donald Trump, është në qendër të debatit për vendin e finales së Kupës së Botës 2030, pas një raportimi të emisionit spanjoll El Partidazo de COPE. Sipas këtij raportimi, në Federatën Spanjolle të Futbollit (RFEF) ekziston frika se finalja mund të mos zhvillohet në Spanjë, por në Marok, për shkak të ndikimit dhe preferencës së Trumpit. Gazetari Juanma Castaño tha se ekziston bindja se presidenti amerikan dëshiron që ndeshja finale të luhet në Marok. Në emision u citua se “Ekziston frika se Donald Trump dëshiron që finalja e Botërorit 2030 të zhvillohet në Marok. Madje kjo është shumë e qartë. Trump ka një antipati të veçantë ndaj Spanjës, ndërsa Maroku është një partner i rëndësishëm i Shteteve të Bashkuara”.
Edicioni i vitit 2030 i Kupës së Botës do të organizohet nga Spanja, Portugalia dhe Maroku, ndërsa ndeshjet hapëse pritet të zhvillohen në Uruguai, Argjentinë dhe Paraguai. FIFA ende nuk ka përcaktuar zyrtarisht vendin që do të presë finalen e turneut. Në Spanjë, dy stadiume kryesore janë në garë për të pritur finalen: Spotify Camp Nou në Barcelonë dhe Santiago Bernabéu në Madrid. Nëse finalja i besohet Marokut, kandidati kryesor për të pritur ndeshjen është Stadiumi Hassan II, një impiant me kapacitet rreth 115 mijë spektatorësh, i cili aktualisht është në ndërtim.
Presidenti i Federatës Spanjolle të Futbollit, Rafael Louzán, u shpreh së fundmi i bindur se finalja duhet të zhvillohet në Spanjë. Ai deklaroi se “Nuk do të kishte kuptim që Spanja të mos ishte mikpritëse e finales së Botërorit. Nuk duhet të ketë asnjë dyshim se finalja duhet të luhet në Spanjë, sepse ky Botëror lindi si një projekt i Spanjës dhe Portugalisë, ndërsa Maroku iu bashkua më vonë”, sipas një interviste për Cadena SER. Pavarësisht spekulimeve dhe deklaratave, çështja mbetet e pazgjidhur derisa FIFA të marrë një vendim zyrtar për stadiumin që do të presë finalen e Kupës së Botës 2030.
