Presidenti Donald Trump u shpreh i pakënaqur me propozimin më të fundit të Iranit për përfundimin e luftës, duke hedhur dyshime mbi gjasat që ky vend të pranojë ndonjëherë një marrëveshje të qëndrueshme. Në deklaratën për gazetarët në South Lawn të Shtëpisë së Bardhë ai tha se “Ata duan të bëjnë një marrëveshje” por shtoi se “Unë nuk jam i kënaqur me propozimin e fundit”. Trump nuk sqaroi detajet e aspekteve të dokumentit iranian që nuk mund t’i pranonte.
Ai theksoi se, megjithë disa përparime, nuk është i bindur në arritjen e një zgjidhjeje përfundimtare, duke përmendur “mosmarrëveshje të jashtëzakonshme” midis udhëheqësve të Iranit. Presidenti përshkroi udhëheqjen iraniane si “shumë të paqëndrueshme”, duke thënë se ekzistojnë dy, tri, ndoshta katër grupe brenda saj, dhe se kjo çon në konfuzion pavarësisht dëshirës për të arritur një marrëveshje. Sipas tij, të gjithë duan të bëjnë një marrëveshje, por “të gjithë janë të ngatërruar”.
Trump renditi dy opsione kryesore të tij për Iranin: një përshkallëzim i madh ushtarak ose arritja e një marrëveshjeje diplomatike. Ai i formuloi alternativat në formë pyetjeje retorike: “A duam t’i shpërthejmë me forcë dhe t’i shkatërrojmë përgjithmonë? Apo duam të përpiqemi të bëjmë një marrëveshje. Këto janë mundësitë”. Presidenti konfirmoi se kishte marrë mbrëmë nga Komanda Qendrore e SHBA-së informacione të përditësuara mbi opsionet ushtarake.
Megjithë këto alternativat, ai shtoi se preferenca e tij ishte të mos rifillonin fushatat e bombardimeve. “Në një bazë njerëzore, do të preferoja jo,” tha Trump, duke theksuar se favorizon zgjidhjet joushtarake kur është e mundur.
