Presidenti i Shteteve të Bashkuara, Donald Trump, njoftoi se do të kërkojë kompensim financiar nga Irani për personat që, sipas tij, janë vrarë ose plagosur rëndë nga Teherani gjatë konfliktit të armatosur që vazhdon prej 28 shkurtit të këtij viti. Deklarata vjen si përgjigje ndaj kërkesave të Iranit për kompensim për dëmet e shkaktuara nga sulmet amerikane dhe izraelite.
Në një postim në platformën Truth Social, Trump shkroi se tashmë edhe ai po kërkon dëmshpërblim nga Irani. Ai përmendi viktimat e sulmeve dhe konflikteve të lidhura me Iranin, si dhe familjet e personave që, sipas tij, janë vrarë gjatë protestave antiqeveritare në vend. Presidenti amerikan iu referua gjithashtu sulmit ndaj një anije luftarake amerikane në Jemen, në tetor 2000, duke përmendur se sulmi vetëvrasës, i atribuuar Al-Kaedës, shkaktoi vdekjen e 17 marinarëve amerikanë dhe plagosjen e më shumë se 30 të tjerëve.
Nga ana tjetër, Irani ka vendosur disa kushte për rihapjen e Ngushticës së Hormuzit. Mes tyre shteti iranian kërkon kompensimin për dëmet e shkaktuara, heqjen e sanksioneve dhe përfundimin e kërcënimeve ushtarake amerikane. Këto kërkesa janë pjesë e një përplasjeje më të gjerë rreth përgjegjësisë dhe dëmshpërblimit mes Teheranit dhe Uashingtonit, ndërsa palët shkëmbejnë akuza dhe kërkesa reciproke.
Përplasja mbi kompensimet po ndodh në një klimë tensionesh të larta mes dy vendeve. Në të njëjtën kohë, organizatat e të drejtave të njeriut raportojnë se autoritetet iraniane vazhdojnë të godasin kundërshtarët e qeverisë, duke theksuar situatën e brendshme të represionit në Iran. Kjo përkon me momentin kur çështjet e kompensimeve dhe sigurisë rajonale që lidhin ngushticën e Hormuzit mbeten shumë të ndjeshme dhe me pasoja të drejtpërdrejta për lëvizjen ndërkombëtare dhe interesat ushtarake. Top Channel.
