Komiteti i Etikës në Dhomën e Përfaqësuesve në SHBA ka hapur një hetim ndaj deputetit demokrat Jimmy Gomez, pas akuzave për sjellje të pahijshme seksuale, sipas tre burimeve që i thanë CNN-it dhe që kërkuan të mbeten anonime. Paneli ka nisur kontaktet fillestare për të verifikuar një artikull të New York Post, ku pretendohej se Gomez ishte parë duke u puthur me një asistente gjatë një feste private në vitin 2023. Zëdhënësi i Gomez-it i kishte mohuar këto akuza, duke i cilësuar si “të pavërteta”.
Gjatë verifikimeve të këtij rasti, hetuesit kanë marrë informacione edhe për pretendime të tjera të ngjashme, të cilat po shqyrtohen brenda hetimit. Hetimi, i cili nuk ishte bërë publik më parë dhe ndodhet ende në fazat e para, konsiderohet si pjesë e përpjekjeve të Komitetit të Etikës për të trajtuar seriozisht akuzat për sjellje të pahijshme brenda Kongresit amerikan. Komiteti nuk ka pranuar të komentojë mbi çështjen.
Në një deklaratë publike, Gomez pranoi se kishte bërë gabime personale në të kaluarën që kishin ndikuar në familjen e tij, por theksoi se ato nuk përbëjnë shkelje ligjore apo shkelje të rregullave të Kongresit. Ai u shpreh i gatshëm të bashkëpunojë plotësisht me Komitetin e Etikës dhe të japë çdo informacion të nevojshëm. Në deklaratën që bëri publike, Gomez tha se “vite më parë kam bërë gabime personale jashtë martesës që kanë shkaktuar dhimbje reale për familjen time,” dhe se veprimet e tij, edhe pse konsensuale, nuk shkelin ligjin apo rregullat e etikës së Dhomës së Përfaqësuesve, por pranoi se ato kishin pasur ndikim mbi të afërmit.
Hetimi është në fazë fillestare dhe informacionet e reja që kanë dalë gjatë verifikimeve po hetohen për të përcaktuar natyrën dhe shtrirjen e pretendimeve. Gomez përfaqëson distriktin e 34-t në Kaliforni.