Një ngjarje e rëndë ka tronditur familjen e ndihmëstrajnerit të Kansas City Chiefs, Eric Bieniemy, pasi bashkëshortja e tij, Mia Bieniemy, 57 vjeçe, u qëllua me armë zjarri në banesën e tyre në Ashburn, Virginia. Sipas policisë së kontesë Loudoun, ajo u plagos rëndë nga disa të shtëna dhe u dërgua në spital, ku ndodhet në gjendje të qëndrueshme. Burime për ESPN bëjnë të ditur se Mia u godit në kraharor dhe në krah.
Djali i çiftit, Elijah Zion Bieniemy, 27 vjeç, është arrestuar dhe akuzohet për plagosje të rëndë, përdorim të armës gjatë një krimi dhe për shkrepje me armë brenda një banese. Autoritetet thanë se policia mbërriti në banesë të dielën në mbrëmje pas një telefonate për të shtëna me armë. Elijah mbahet aktualisht në paraburgim pa mundësi lirimi me kusht, ndërsa hetimet vazhdojnë.
Pas incidentit, Eric Bieniemy u largua nga kampi stërvitor i Kansas City Chiefs dhe nuk mori pjesë në stërvitjen e së hënës. Trajneri i skuadrës, Andy Reid, shprehu mbështetjen e tij për Bieniemy dhe familjen, duke theksuar se Mia është në gjendje të qëndrueshme dhe se e rëndësishme është që Bieniemy të kalojë kohë me familjen dhe të kujdeset për situatën. Reid bëri të ditur se nuk dihet ende se kur Bieniemy do të rikthehet te skuadra, ndërsa detyrat e tij do të mbulohen përkohësisht nga pjesëtarë të tjerë të stafit.
Eric Bieniemy është një nga trajnerët më të njohur në futbollin amerikan; ai ka qenë pjesë e stafit të Kansas City Chiefs për shumë vite dhe ka ndihmuar ekipin të fitojë dy tituj Super Bowl. Më pas ka punuar edhe me skuadra të tjera në NFL dhe u rikthye te Chiefs këtë vit.
Hetimet mbi ngjarjen vazhdojnë ndërkohë që familja dhe stafi i Chiefs janë duke u marrë me pasojat e incidentit. Nuk ka informacione shtesë zyrtare për motivet apo rrethanat e plota të përleshjes në publikimin e autoriteteve.
